رێڤه‌به‌رێ تاقیگه‌ها ناڤه‌ندییا دهۆكێیا تایبه‌ت ب كۆرۆنایێ دیاركر كو پشتی ره‌وشا هاتن و چون دناڤبه‌را پارێزگه‌هێن هه‌رێما كوردستان و وه‌لاتێ توركیا تا راده‌یه‌كی ئاسایی بووی، مه‌ترسی و كارتێكرنه‌كا زۆر ل سه‌ر پارێزگه‌ها دهۆكێ دروست كرییه و حاله‌تێن كۆرۆنایێ د زێده‌بوونێدانه.
هه‌تا نوكه ره‌وشا پارێزگه‌ها دهۆكێیا كونترولكری بوو
دكتۆر ره‌وه‌ند عه‌بدولخالق رێڤه‌به‌رێ تاقیگه‌ها ناڤه‌ندییا دهۆكێیا تایبه‌ت ب كۆرۆنایێ بۆ "وشه" گۆت، دنوكه دا مه‌ترسییه‌كا زێده ل سه‌ر پارێزگه‌ها دهۆكێیه و حاله‌تێن كۆرۆنایێ د زێده‌بوونێدانه.
زێده‌تر گۆت "پشتی كو حكوومه‌تا هه‌رێما كوردستانێ بریاردایی هاتن و چوون ناڤبه‌را پارێزگه‌هێن هه‌رێما كوردستانێ و وه‌لاتێ توركیا تا راده‌یه‌كی ئاسایی ببیت و وه‌لاتی خوه ل مال كه‌ره‌نتین بكه‌ن، ئه‌ڤ یه‌ك بوویه ئه‌گه‌ر كو كارتێكرن و مه‌ترسییه‌كا زێده یا به‌لاڤبوونا په‌ژیكا كۆرۆنایێ ل پارێزگه‌ها دهۆكێ دروست بیت، ژبه‌ركو هه‌تا نوكه ره‌وشا پارێزگه‌ها دهۆكێیا كونترولكری بوو"
رێڤه‌به‌رێ تاقیگه‌ها ناڤه‌ندییا دهۆكێیا تایبه‌ت ب كۆرۆنایێ د درێژاهییا ئاخفتنێن خو دا دیاركر ژی كو نوكه زێده‌تری هه‌ر ده‌مه‌كێ دڤێت وه‌لاتیێن پارێزگه‌ها دهۆكێ خوه ژ كۆرۆنایێ بپارێزن و گۆت ژی "دڤێت وه‌لاتی ب تمام پابه‌ندیێ رێنمایێن خوه‌پاراستنێ بن تایبه‌تی خوه دویر بكه‌ن ژ جهێن قه‌ره‌بالغ، دیسان دڤێت به‌رده‌وام ماسك و ده‌ستكێشا و مادێن پاقژكرنێ بكار بینن و ده‌ستێن خوه بشوون، هه‌ند ل مال هه‌ند ژی ل ده‌رڤه‌یێ مال ب تایبه‌تی ل جهێن گشتی و بازاڕ و گرتی، به‌لێ زێده‌باری هه‌ر سه‌ختی و دژوارییه‌كا كۆرۆنایێ ئه‌م دێ ل سه‌ر ئه‌رك و خزمه‌تا وه‌لاتییان و پاراستنا وان به‌رده‌وام بین"
ل سنوورێ پارێزگه‌ها دهۆكێ 424 كه‌س تووشی كۆرۆنایێ بووینه، ژ وان 331 تووشبوو چاك بووینه و دووباره جاره‌كا دی ڤه‌گه‌ریانه مال، د نوكه دا تنێ 93 تووشبوو ل نه‌خۆشخانێن كۆرۆنایێ ل دهۆكێ چاره‌سه‌رییا وان دهێته‌كرن و ل بن چاڤدێرییا نوژداراندانه، دده‌ما 24 ده‌مژمێرێن بوری 15 تووشی كۆرۆنایێ بووینه.
ل سنوورێ پارێزگه‌ها دهۆكێ 13 جهـ تایبه‌ت ب كه‌ره‌نتین كرنێ هه‌نه، ئه‌ڤرۆ 16 كه‌س هاتینه كه‌ره‌نتین كرن، د به‌رامبه‌ر دا 72 كه‌س ژ كه‌ره‌نتینێ داوی هاتنه، هه‌ردیسان هه‌تا نوكه 11 هزار و 178 كه‌س هاتینه كه‌ره‌نتین كرن، ژ وانان 10 هزار و 526 كه‌س ژ كه‌ره‌نینان ده‌ركه‌فتنه. ره‌زیكی هوسا گۆت.