بڕیاره له ئاینده‌یه‌كی نزیك نوێترین ڕۆمانی "به‌ڕێگاوه" له نووسینی دڵشاد كاوانی وه‌ك یه‌كه‌م ڕۆمانی سادیستی كوردی بۆ یه‌كه‌م جار چاپ بكرێت و بكه‌وێته به‌رده‌ستی خوێنه‌رانی كورد.
به‌مزووانه ده‌كه‌وێته به‌رده‌ستی خوێنه‌ران
ئه‌مڕۆ سێشه‌م چواری ئاب، دڵشاد كاوانی نووسه‌ری ڕۆمانی "به‌ڕێگاوه" به "وشه"ی ڕاگه‌یاند، "ئه‌م ڕۆمانه به‌شێوه و ته‌كنیكی جیاواز نووسراوه، ناوه‌ڕۆكی ڕۆمانه‌كه باس له سادیستی و ماسۆژییه‌ت ده‌كات و خوێن و كوشتن وه‌ك ژێده‌رێكی سه‌ره‌كی ناو ڕۆمانه‌كه‌یه."
زیاتر گوتی، "ڕۆمانی به‌ڕێگاوه ڕۆمانێكی ده‌روونی، فه‌لسه‌فی، مێژووییه كه پشتی به تیۆرییه‌كانی ئه‌رستۆ و داروین و فرۆید و ئه‌ریك فرۆم، ماكیافیلی به‌ستووه و باس له پێكدادانه‌كانی ئاینی و شارستانیی و ده‌سه‌ڵاتدارییه‌تی ده‌كات".
له رێی ئه‌و ڕۆمانه‌وه نووسه‌ر باس له نه‌خۆشییه ده‌روونییه‌كان و دیدگای فه‌لسه‌فی و ڕوانینه فكرییه‌كان بۆ ژیان ده‌كات
ئاشكرای كرد، "ڕۆمانی به‌ڕێگاوه پێكهاتووه له 415 لاپه‌ڕه له‌گه‌ڵ فه‌رهه‌نگۆكێكی كوردی له سێ هه‌زار و 380 وشه. ژماره‌ی سپاردنی 490ی ساڵی 2020 به‌ڕێوه‌به‌رایه‌تی كتێبخانه گشتییه‌كانی وه‌رگرتووه، له چاپخانه‌ی جه‌نگه‌ڵ له تاران چاپ ده‌كرێت، له‌لایه‌ن ڕزگار كاوانی هه‌ڵه‌چنی بۆ كراوه و خانه‌ی ئاشتی سه‌رپه‌رشتی چاپ و بڵاوكردنه‌وه‌ی ده‌كات، به‌مزووانه ده‌كه‌وێته به‌رده‌ستی خوێنه‌ران."
ڕوونی كرده‌وه، "ئه‌م ڕۆمانه به‌شێوه و ته‌كنیكێكی تایبه‌ت نووسراوه، پێشه‌كی و كۆتایی ڕۆمانه‌كه به یه‌ك دیمه‌ن ده‌ست پێ ده‌كات و به هه‌مان دیمه‌ن كۆتایی دێ، ئه‌ویش به هه‌وڵی خۆكوژی و پاشگه‌زبوونه‌وه‌ی نووسه‌ری رۆمانه‌كه و كاره‌كته‌ر و پاڵه‌وانی سه‌ره‌كی گێڕه‌وه‌ی ڕۆمانه‌كه‌یه. له‌گه‌ڵ پێشه‌كی دووه‌م هاوبه‌شه له سه‌رجه‌م به‌شه‌كانی تر، ڕۆمانه‌كه له دوو به‌شی سه‌ره‌كی له ژێر ناوی په‌تای ده‌نگ و چێژی خوێن و 18 به‌شی بچووكی تر كه به ژماره و هه‌م به سه‌ردێڕی ڕووداوه گرنگه‌كان ده‌ست پێ ده‌كه‌ن و خۆی له 690 هه‌زار و 390 وشه ده‌بینێته‌وه."
ئه‌وه‌ی خسته‌ڕوو، ڕۆمانی به‌ڕێگاوه باسی ماڵباتی میرێك ده‌كات دوای له ده‌ستدانی ده‌سه‌ڵات میر، نه‌وه‌كانی به دوای گه‌ڕانه‌وه‌ی ده‌سه‌ڵاتی میرایه‌تییه‌وه‌ن، هه‌روه‌ها له ناو ڕووداوی ڕۆمانه‌كه باس له بڵاوبوونه‌وه‌ی په‌تایه‌ك ده‌كات به‌ناوی په‌تای قسه‌كردن و دواتر ئه‌م په‌تایه ده‌بێته هه‌وێنی سه‌رهه‌ڵدانی شۆڕشێكی فكری و چینایه‌تی و كۆمه‌ڵایه‌تی و داڕووخانی ده‌سه‌ڵاتی سته‌مكاری."
"ناوی ڕۆمانی به‌ڕێگاوه مه‌به‌ست له ئۆتۆمبێلێكی كۆنی شل و شۆقه كه به‌رده‌وام له ڕۆیشتندایه و هه‌رجاره و چه‌ندان كاره‌كته‌ری ناو رۆمانه‌كه‌ی هه‌ڵده‌گرێ، به ڕێیه سه‌خته‌كان و ڕێچكۆكه ته‌سك و سه‌خته‌كاندا ده‌ڕوات. ئه‌مه‌یش مه‌به‌ست له مێژووی كورده به درێژایی مێژوو به شل و شۆقی له رۆیشتن به‌رده‌وامه، گه‌له‌كه‌ی به هه‌ر سه‌ختی و چه‌رمه‌سه‌رییه‌ك بێ، دواجار ده‌گه‌یه‌نێته دواین شوێنی مه‌به‌ست." دڵشاد كاوانی نووسه‌ری ڕۆمانی به ڕێگاوه وای گوت.
ڕۆمانه به یه‌كه‌م ڕۆمانی سادیستی كوردی خۆماڵی دێ كه راسته‌وخۆ خوێن و كوشتن به‌شێكی سه‌ره‌كی ڕۆمانه‌كه پێك دێنێ
له رێی ئه‌و ڕۆمانه‌وه نووسه‌ر باس له نه‌خۆشییه ده‌روونییه‌كان و دیدگای فه‌لسه‌فی و ڕوانینه فكرییه‌كان بۆ ژیان ده‌كات، له ئایدیاكان و تێگه‌یشتنه فه‌لسه‌فییه‌كان پشت به فه‌لسه‌فه‌ی فۆرمی ئه‌رستۆ و شیكارییه ده‌روونییه‌كانی ئۆدیب و ئه‌لیكترا و نه‌رجسییه‌تی سیگمۆند فرۆید و نكرۆفیلیا و نكرۆفلوجیای سادیستی ئه‌ریك فرۆم به‌ستراوه. به‌شێكیان بوونه‌ته ناوی كاره‌كته‌ری سه‌ره‌كی ناو ڕۆماكه‌ش، هه‌روه‌ها باس له عیرفان و ته‌سه‌وفی ئیسلامی و كاریگه‌رییه‌كانی ده‌كات و پێكدانانی ئاینه‌كان و شارستانییه‌ته زۆره‌ملێكان و تێكه‌ڵبوونی ده‌سه‌ڵات و ئاین و ململانێی نێوان ئاینه‌كان ده‌كات، له ڕێی نه‌وه‌كانی میر كه پاڵه‌وانی ڕۆمانه‌كه‌ن، ئه‌ویش میر خۆی جووله‌كه و شێمرازی مسوڵمان و قۆیتاسی كریستیان و ئه‌لیكترای زه‌رده‌شتی ده‌خاته ڕوو. رۆمانه‌كه به زمانێكی ساده و كوردییه‌كی پاراو نووسراوه، جگه له ناوه زانستی و فكرییه‌كان كه 22 په‌راوێزی بۆ كراوه، له كۆتایی ڕۆمانه‌كه فه‌رهه‌نگۆگێك به مه‌به‌ستی زانین و ئاسان تێگه‌یشتن له وشه و زاراوه ئیدیۆمه‌كان و زمان و شێوه‌زاره‌كان له فه‌رهه‌نگۆگه‌كه، 30 هه‌زار و 380 وشه‌ی تێدایه و ئه‌وه‌ی به گرنگ زانراوه واتا و لێكدانه‌وی بۆ كراوه.
ده‌توانین بڵێین ئه‌م ڕۆمانه به یه‌كه‌م ڕۆمانی سادیستی كوردی خۆماڵی دێ كه راسته‌وخۆ خوێن و كوشتن به‌شێكی سه‌ره‌كی ڕۆمانه‌كه پێك دێنێ، ده‌توانرێ به‌شی یه‌كه‌م به په‌تا و نه‌خۆشی دیاری بكرێ، له‌م به‌شه‌دا كێشه‌كانی ناو ڕووداوه‌كانی رۆمانه‌كه به‌ره‌و ئاڵۆزبوون ده‌چن. له به‌شی دووه‌میشی به گرێ ده‌روونییه‌كان و خوو و ئولفه‌تگرتن به خوێن و تووشبوون به نه‌خۆشییه ده‌روونییه‌كانی وه‌ك نكرۆفیلیا مه‌رگدۆستی، نكرۆفلوجیا، دڕه‌نده‌بوون و سادیستی عاشقبوون و خووگرتن به ئازار و خوێنڕشتن. له كۆتایی ڕۆمانه‌كه‌دا ئاكامی پێكدادانه‌كان هه‌موویان هه‌ره‌س دێنن، په‌شیمانی و گه‌ڕانه‌وه بۆ ڕه‌چه‌ڵكی مرۆڤبوون كۆتایی ڕووداوه‌كه‌یه. ڕۆمانه‌كه باس له چه‌ند هه‌رێمێكی جیاواز ده‌كات كه پێچه‌وانه‌ی یه‌كترن و به خه‌یاڵ و فانتازیا ڕازێنراونه‌ته‌وه، به‌شێكی زۆری ڕۆمانه‌كه پێك ده‌هێنێت، جگه له‌مه هه‌ژاری و چه‌رمه‌سه‌ری كێشه كۆمه‌ڵایه‌تییه‌كان به‌ته‌واوی له ناو ڕۆمانه‌كه ڕه‌نگی داوه‌ته‌وه.
مه‌به‌ستی نووسه‌ر له و ڕۆمانه به هۆی زیادبوونی دیارده‌ی كوشتن و تاوانكاری له نێوان مرۆڤایه‌تی، به‌تایبه‌تی ئه‌و زنجیره كوشتنانه‌ی كه له ساڵانی دوایی ڕووی له كۆمه‌ڵگای كوردی كردووه، نووسه‌ر پێی وایه ئه‌مه تاوانی ئاسایی نییه، به‌ڵكو جۆرێكه له لاساییكردنه‌وه و دووباره‌بوونه‌وه‌ی ئه‌و ڕێچكه و كوشتنانه‌ی كه وه‌ك هاتنی شه‌پۆلی سۆشیال میدیای ئازاد و سه‌یركردن و بینینی سه‌رجه‌م دیمه‌نه‌كانی كوشتن و بڕینی سه‌رجه‌م دنیا و به‌بێ چاودێری، مانه‌وه‌ی پاشخانی توندوتیژییه‌كانی داعش و رێكخراوه توندڕه‌وه‌كانی تر، كاریگه‌ریی نه‌رێنیی كردووه‌ته سه‌ر گه‌نجان و نه‌وجه‌وانانی كورد، به‌مه‌ش هه‌ندێ تاوانی نائاسایی له دادگاكانی هه‌رێم تۆمار كراون، ناكرێ به كوشتنی ئاسایی سه‌یر بكرێ وه‌ك كوشتنی دایك و باوك برا و خێزان و خۆشه‌ویستانی كه‌سی تاوانكار به ده‌ستی خۆی و شێواندن و لێكردنه‌وی پارچه‌ی جه‌سه‌ته و كوشتنی خێزانی سێ چوار كه‌سی به كۆمه‌ڵ، كه هه‌رگیز له پێشوودا له ناو كۆمه‌ڵگای كوردیدا ڕووی نه‌داوه. له‌م ڕۆمانه‌دا به وردی له‌سه‌ر ئه‌م ده‌سته و گرووپانه وه‌ستاوه و بێ په‌رده تاوانه‌كان و لێكه‌وته‌كانی خراوه‌ته ڕوو به مه‌به‌ستی دۆزینه‌وه‌ی چاره‌سه‌ری شیاو و جووڵاندنی هه‌ستی خوێنه‌ر به دووركه‌وتنه‌وه له تاوان و تاوانكارانی خوێن.