یانا نوهەدرا یا سریانی ل دهۆکێ کو ل سالا 1975 هاتیە دامەزراندن و رولەکێ گرنگ د پێگەهاندن و پەروەردە و رەوشەنبیری و هەستا نەتەوەیی یا خەلکێ دهۆکێ دا هەبویە ب تایبەتی ل سەردەمێ رژێما بەعس و مالا پرانیا هونەرمەندێن کوردستانێ بویە، د نوکە دا یا ژناڤ دچیت، نڤیسەرەکێ دێرینێ دهۆکێ ژی دخوازیت جارەکا دی رولێ یانا نوهەدرا بهێتە کاراکرن.
یانا نوهەدرا دەهان هونەرمەندێن کوردستانێ د چالاکیێن خوە دا ڤەحەواندنە
ئیسماعیل جانگیر، نڤیسەرێ دێرینێ دهۆکێ بۆ "وشە" گوت، نوهه‌درا ناڤێ سریانیێ دهۆكێ یه وه‌كى دبه‌رپه‌ڕێن كه‌ڤندا هاتى و ل سالا 1975 ده‌ستویریا فه‌رمى ژ وه‌زاره‌تا ناڤخوە یا عیراقێ وه‌رگرتیە و هاتیە دامەزراندن و دەست ب چالاکیێن خوە کریە کو ئێکە ژ یانەیێن سریانی ل دهۆکێ.
زێدەتر گوت "یانا نوهەدرا د وەختێ خوە دا ب گه‌رمى كه‌فته دخزمه‌تا وارێن هزرى و ره‌وشه‌نبیرى و هونه‌ری و پێگەهاندن و پەوەردەکرنا خەلکێ دهۆکێ بێی جوداهیا ئایینى و نه‌ته‌وەیى، بەلکو تنێ کار ب ناسناما دروستیا دهۆكێ پدكر و ل ناڤه‌ڕاستا سالێن هه‌شتیێان كۆڤاره‌ك ژی ب ناڤێ (ئاترا - وه‌لات) به‌لاڤكر و شیا ببیته نموونه‌كا شرین و ناڤه‌كێ جوانێ دهۆكێ و خزمەتەکا گرنگ ژی بۆ دهۆکێ ئەنجام دا"
ناڤبری دیارکر ژی کو سه‌رده‌مێ كاودانێن سه‌خت و ته‌نگاڤدا كو بزاڤا رزگاریخوازا گه‌لێ كورد تووشى شكه‌ستنەکا جه‌رگبڕ ببوو ب تایبەتی ل سالا 1974و ل دەمێ ئەنجامدانا رێككه‌فتنا 6 ئادارا 1975، یانا نوهه‌درا ده‌رگه‌هێن خوە ل همبه‌ر بزاڤ وچالاكیێن نه‌ته‌وەیى و ره‌وشه‌نبیرى ڤه‌كر و بویە پێگورکێ سازیێن راگرتیێن ملله‌تێ كورد و ب ده‌هان روینشتن و سمینار و ڤیسته‌ڤال و ئاهه‌نگێن هونه‌رى ئەنجامدان کو ل وی دەمی رژێما بەعس هەموو چالاکیەک قوت کربوون و زێدەتر گوت "ژ گرنگترین وان چالاکی و ئاهەنگێن ل یانا نوهەدرا هاتینەکرن، ئاهه‌نگ و سمینار و چالاكیێن، هونەرمەندان، ته‌حسین تەها، عه‌یشاشان، عیسا به‌روارى، محه‌مه‌د عارفێ جزیرى، سادق بهائه‌ددین و به‌درخان سندى و سه‌برى بۆتانى بوون، ئەڤە به‌لگه‌یێن روونن ل سه‌ر خه‌مخوورى و دلسۆزیا یانا نوهه‌درا كو ده‌نگێ كوردینیێ گەهاند و چریسكا هەستا نه‌ته‌وەى جارەکا دی ل دهۆكێ گه‌ش کر و مل ب ملێ ئاهه‌نگێن جه‌نان ساوا وجولیانا جندو و... هتد بەردەوام بیت"
ئیسماعیل جانگیر کو خودانێ چەندین پەرتوکێن چاپکریە و رولەکێ کارا د پێشخستنا دهۆکێ دا هەیە ب تایبەتی د وارێ رەوشەنبیری و میدیایێ دا، د درێژاهیا ئاخفتنێن خودا دیار کر ژی کو پشتى سه‌رهلدانا بهارا 1991 جاره‌كا دى یانا نوهه‌درا كه‌فته خزمه‌تێ و هه‌مان ئه‌رك په‌یره‌وكر، هه‌مان نامه و په‌یام هه‌بوو، سالانه ڤیسته‌ڤالا نوهه‌درا دهاته گێڕان، چه‌ند ره‌وشه‌نبیر و هونه‌رمه‌ندێن كورد تێدا پشكدارد بوون و گوت ژی "ژبلی خەلکێ دهۆك، زاخو، ئامێدى و ئاكرێ، هەڤدەم خەلکێ هه‌ولێر، سلێمانى مویسل و كه‌ركوكێ ژى پشکداری د چالاکیێن یانا نوهه‌درا دکر، لەوا نوهەدرا بویە دیروک بۆ دهۆکێ و ل بیرا پرانیا خه‌لكێ دهۆكێ دا مایە، بەلێ جهێ داخێ یە د نوکە دا ئاڤاهیێ نوهەدرا وێران بویە و ناڤ و چالاکی ژی نەماینە، دخوازین جارەکا دی و باشتر ژی ژ بەرێ هه‌مان ناڤ و جهـێ ستراتتیژى کو ل نزیكێ رویبارێ دهۆكێ یە بهێته ڤه‌گه‌ڕاندن و خزمەتا جڤاک و رەوشەنبیر و خەلکێ دهۆکێ بکەت ڤە"
یانا نوهەدرا دکەڤیتە سەنتەرێ باژێرێ دهۆکێ و جاددا نوهەدرا، نێزیکە ل بازاڕێ مەزنێ دهۆکێ و جهەکێ گرنگ و ستراتیجی هەیە.