لە تۆڕە كۆمەڵایەتییەكان لە سووریا، وێنەی دوو گەنجی بریندار و منداڵێك بڵاو بووەتەوە، باس لەوە دەكرێ كە گورگێك لە یەكێك لە گوندەكانی سووریا، منداڵێكی رفاندووە و گەنجەكانیش منداڵەكەیان لە كەڵبەی گورگەكە رزگار كردووە. بۆیە هەرسێكیان بریندار بوون.
شوێنەواری كەڵبەی گورگەكە بە روومەتی منداڵەكەوە دیارە
پێگەی "
ئەلعەرەبیە" ئەمڕۆ پێنجشەم 17ی ئەیلوول بڵاوی كردووەتەوە، لە گوندێكی پارێزگای رەقە لە سووریا، گورگێك منداڵێكی هەشت مانگیی رفاندووە، دوو گەنجیش بەڕێكەوت بینیویانە و ویستوویانە منداڵەكە رزگار بكەن، لەگەڵ رزگاركردنیدا هەردوو گەنجەكە بریندار دەبن.
بەپێی پێگە عەرەبییەكە، منداڵەكە ناوی "عەبدولسەلام غەسان حوسێن" بووە، كاتێك گورگەكە پەلاماری داوە، كەڵبەی لە سەر و دەموچاوی منداڵەكە گیر كردووە و ویستوویەتی بیڕفێنێ، بۆیە بەپێی وێنەكە شوێنەواری كەڵبەی گورگەكە بە روومەتی منداڵەكەوە دیارە. هەردوو گەنجەكەیش دەموچاویان بریندار بووە.
ئەو دوو گەنجە یەكیان ناوی "خزام حەمادی /33 ساڵ/ و ئەوی تریان ناوی ئەنەس یاسین /21 ساڵ/ بووە". بۆیە ئەو رووداوە لە تۆڕە كۆمەڵایەتییەكان بە رووداوێكی سەیروسەمەرە باس دەكرێ، هاوكات ئەو دوو گەنجەیش بە پاڵەوان ناویان دێت.