عەمید عابیدین نەجمەدین بەڕێوەبەری پۆلیسی شارەدێی پردێ بە "وشە"ی راگەیاند، دەنگۆی گواستنەوەی 22 پۆلیس و ئەفسەری كورد لە پردێ دوورە لە راستییەوە، ئەوانەی لە پردێ گواستراونەتەوە 16 كەسن و شەشیان توركمان و 10یان كوردن.
دەبێ لە ماوەی ئەم هەفتەیە پۆلیسی فیدڕاڵی لە بازگەكانی سنووری كەركووك نەمێنن
بەڕێوەبەری پۆلیسی پردێ دەڵێ، گواستنەوەی پۆلیسەكانی ناوخۆ لە سنووری كەركووك بۆ بازگەكانی نێوان شارۆكە و شارەدێكانی پارێزگای كەركووكە.
زیاتر روونی دەكاتەوە، لە هەنگاوێگی گرنگدا دەبێ پۆلیسی فیدڕاڵی بازگەكان رادەستی پۆلیسی ناوخۆ بكات، واتا جگە لە پۆلیسی فیدڕاڵی و لیوای 61ی هێزی سەرۆك وەزیران، تەنیا پۆلیسی ناوخۆ دەبرێتە بازگەكان و هاوكات ژمارەی بازگەكانیش كەم دەكرێنەوە.
ئەو بەرپرسەی پۆلیس ئاشكرای دەكات، كەمكردنەوەی بازگەكانیش بەپێی رێككەوتنی نێوان هەرێمی كوردستان و حكوومەتی عێراقە.
جەواد محەمەد بەرپرسی لیژنەی ناوچەی دووبزی پارتی دیموكراتی كوردستان بۆ "وشە" روونی دەكاتەوە، ئەو هەنگاوە بە گرنگ دەبینین و جێگیركردنی پۆلیسی ناوخۆ یەكێك بووە لە داواكارییەكانی كوردی ناوچەكە.
ئەو بەرپرسەی پارتی دیموكراتی كوردستان نایشارێتەوە، پۆلیسی فیدڕاڵی لە ناوچەكە بووبوون بە مایەی بێزاریی هاووڵاتییانی كورد و نەمانیان لە كەركووك داوای كورد بووە.
خالد ئیبراهیم بەرپرسی كۆمیتەی یەكێتی لە دووبز بە "وشە"ی راگەیاند، هەر هەوڵێك لە بەرژەوەندی هاووڵاتییاندا بێت پشتگیری دەكەین و ئامادە نەبوو هیچ لێدوانێكی تر لەو پێوەندییەوە بدات.
بەپێی زانیارییەكانی "وشە" دەبێ لە ماوەی ئەم هەفتەیە پۆلیسی فیدڕاڵی لە بازگەكانی سنووری كەركووك نەمێنن و لە شوێنیان پۆلیسی ناوخۆیی دابنرێت.
گەرمیان / سەبری هۆرێنی