ڤیدیۆ...تۆماس موله‌ر له‌گه‌ڵ په‌یامنێرێكی ته‌له‌ڤزیۆن به‌گژیه‌كدا ده‌چن

:: PM:12:54:14/01/2021 ‌
تۆماس موله‌ری هێرشبه‌ری یانه‌ی بایرن میونشن، دوای شكستی یانه‌كه‌ی به‌رامبه‌ر یانه‌یه‌كی پله‌ دوو له‌ جامی ئه‌ڵمانیا و چوونه‌ده‌ره‌وه‌یان له‌ ركابه‌رییه‌كان، له‌گه‌ڵ په‌یامنێرێك به‌گژیه‌كدا ده‌چن.

بایرن شه‌وی رابردوو له‌ قۆناغی دووه‌می جامی ئه‌ڵمانیا به‌رامبه‌ر یانه‌ی هۆڵشتن كیڵ، كه‌ یانه‌یه‌كی پله‌ دووه‌، به‌ 5-6 گۆڵ به‌ لێدانه‌ یه‌كلاكه‌ره‌وه‌كان دۆڕا و ماڵئاوایی له‌ پاڵه‌وانیه‌تییه‌كه‌ كرد، ئه‌مه‌ش دوای ئه‌وه‌ی له‌ كاتی ئاسایی و زیادكراوی یارییه‌كه‌دا به‌ 2-2 گۆڵ یه‌كسان بوون.

شكسته‌كه‌ی بایرن سوپرایزێكی گه‌وره‌ و چاوه‌ڕواننه‌كراو بوو، بۆیه‌ كاریگه‌ریی به‌سه‌ر یاریزانانی یانه‌كه‌وه‌ هه‌بوو.

تۆماس موله‌ر له‌ دوای یارییه‌كه‌ بۆ كه‌ناڵی  ARDی ئه‌ڵمانی قسه‌ی كرد و پرسیاری ده‌باره‌ی میزاجی یاریزانانی یانه‌كه‌ی لێكرا، ئه‌ویش به‌ په‌له‌ و به‌ تووندی وه‌ڵامی په‌یامنێره‌كه‌ی دایه‌وه‌ و گوتی  "تۆ ئێسته‌ پێده‌كه‌نیت؟"

په‌یامنێره‌كه‌ ره‌تی كرده‌وه‌ كه‌ پێكه‌نینی كردبێت، به‌ڵام موله‌ر گوتی: بێگومان تۆ پێده‌كه‌نیت، پێت وایه‌ چییه‌، بێگومان ئێمه‌ هه‌ست به‌ خه‌مباری ده‌كه‌ین و هه‌ر ئه‌وه‌ش چاوه‌ڕێ ده‌كرێت، بارودۆخی تیپه‌كه‌مان باش نییه‌".

هه‌روه‌ها گوتی: "له‌ كۆتاییدا ئێمه‌ به‌رامبه‌ر یانه‌ی كیڵ دۆڕاین، كه‌ هه‌رچی توانای هه‌بوو له‌سه‌ر یاریگه‌ی خۆیدا پێشكه‌شی كرد".

له‌ ڤیدیۆیه‌كه‌دا و له‌ به‌شی كۆتایی قسه‌كاندا، كه‌ به‌ ئه‌ڵمانییه‌، ده‌رده‌كه‌وێت كه‌ موله‌ر به‌ په‌یامنێره‌كه‌ ده‌ڵێت، تۆ ئێسته‌ پێده‌كه‌نیت؟




وشە - ئەرسەلان عەبدوڵا

ئه‌م بابه‌ته 48 جار خوێنراوه‌ته‌وه‌‌