ئێوارەی ئەمڕۆ لەسەر ڕێی هەڵەبجە - هەورامان نزیك بازگەی دەرەشیش ڕووداوێکی هاتوچۆ لەجۆری وەرگەڕان ڕوویدا و بەهۆیەوە ژنێکی تەمەن 23 ساڵ گیانی لە دەست دا و پێنج کەسی تریش برینداربوون.
بەرزان عوسمان، گوتەبێژی پۆلیسی پارێزگای هەڵەبجە له ڕاگه‌یاندراوێكدا ڕاى گەیاندووه، ئیوارەی ئەمڕۆ هه‌ینى لە ئەنجامی وەرگەڕانی ئۆتۆمبیڵێکی جۆری (جیب لیبرتی) لەسەر ڕێی هەڵەبجە - هەورامان نزیك بازگەی دەرەشیش ژنێک بەناوی (س.ع.س) تەمەن 23 ساڵ دانیشتووی پارێزگای سلێمانی گەڕەکی فەرمانبەران گیانی لە دەست داوە و پێنج سەرنشینی تریش برینداربوونه.
ئاماژە كراوه، لەبەر سەختی برینەکانیان دوو برینداریان ڕەوانەی نەخۆشخانەی فریاکەوتنی سلیمانی کراون و سێ برینداری تریش لە نەخۆشخانەی فریاکەوتنی هەڵەبجەن، تەرمی ژنەکەیش ڕەوانەی پزیشکی دادی پارێزگای هەڵەبجە کراوە.
ئەوەیشی خستووه‌تەڕوو، شۆفیری ئۆتۆمبێڵەکە بەبڕیاری دادوەری لێکۆڵینەوە بەگوێرە مادەی 24ـی هاتوچۆ بەندکراوە و دۆسیەی لیکۆڵینەوە بۆ ڕووداوەکە لە بنکەی پۆلیسی خورماڵ ڕێکخراوە.