ئاسایشی هەولێر بكوژی مەلا مەحموود ئاشكرا دەكات كە لەسەرەتای ئەو مانگە لەناو مەڵەكەی خۆیدا كوشتیان و بڕی هەشت دەفتەر 80 هەزار دۆلاریان برد.
ئەمڕۆ پێنجشەم لە راگەیەندراوێك لە بەڕێوەبەرایەتی ئاسایشی هەولێرەوە وێنەیەكی بۆ "وشە" نێردراوە تیایدا هاتووە، دوای چەندین رۆژ لە لێكۆڵینەوە و چاودێری تیمەكانمان لە بەڕێوەبەرایەتی ئاسایشی هەولێر، توانرا گروپێكی پێنچ كەسی (دزیكردن و كوشتن) دەستگیر بكەین كە دەستیان لە چەند تاوانێكی رێكخراوی ناو شاری هەولێردا هەبووە.
گروپی دەستگیركراو پێكهاتوون لە تاوانباران (محمد صابر عبدالله، طارق عزیز محمود، سەركەوت كریم حمد، نزام شكر اسماعیل و كاوە محمد خضر).
لە ڕاگەیەندراوەكەی ئاسایشی هەولێر هاتووە، بەپێی دانپێدانانەكانی دەستگیركراوان، دوایین تاوانی ئەم گروپە، كوشتنی هاوڵاتی (محمود عسمان محمدامین) ناسراو بە (مەلا محمود) بوو، كە شەوی 31/1/2017 لە "شاری منارە" لە پێش ماڵەكەی خۆی كوشتیان و نزیكەی هەشتا هەزار دۆلاری ناوبراویان دزیوە، مەلا مەحمود پێشتر وتاربێژ بووە و خاوەنی نوسینگەی ئاڵوگۆڕی دراو بووە لە شاری هەولێر.
بەپێی دانپێدانانیان لەلێكۆڵینەوەكاندا، گروپی تاوانكار دەستیان لە چەندین تاوانی دیكەی دزی و هەڵكوتانە سەر ماڵان و هاووڵاتیانی مەدەنیدا هەبووە.
لێكۆڵینەوە و رێككارە یاساییەكان بەردەوامە و لە ئایندەی نزیكدا وردەكاری زیاتر لەوبارەیەوە بۆ رای گشتی دەخەینەڕوو، بە پێویستیشی دەزانین سوپاسی هاووڵاتیانی شاری هەولێر بكەین، لە هاوكاری بەردەوامیان بۆ بەڕێوەبەرایەتی ئاسایش و زانیاری پێدان لەسەر گومانلێكراو و تاوانباران.
مەحموود عوسمان محەممەدئەمین ناسراو بە "مەلا محمود" شەوی 31/1/2017، لە "گوندی منارە"ی هەولێر، لە پێش ماڵەكەی خۆی كوژرا و نزیكەی هەشتا هەزار دۆلاریش كە پێی بوو، دزرا.