رەوتی یەكگرتنەوەی دیموكراتەكان بەرەو قۆناغی كۆتایی هەنگاو دەنێت. محەمەد نەزیف قادری جێگری دووەمی لێپرسراوی گشتی حزبی دیموكراتی كوردستانی ئێران، لەم چاوپێكەوتنەدا بۆ "وشە" رای دەگەیەنێت، حدكا بەردەوام دەبێت لە چالاكی پێشمەرگانەی لە ناوخۆی رۆژهەڵاتی كوردستان و ئاماژە بەوەیش دەدات، حدكا هیچ شێوازێكی خەبات بەسەر شێوازەكانی تردا ناسەپێنێت.
* رەوتی یەكگرتنەوەی دیموكراتەكان رژدتر بووە و لە رۆژهەڵات ئەندام و لایەنگرانی ئەو حزبە دەیانەوێ دانوستانەكان خێرا بگەنە ئامانج و یەكگرتنەوەكە روو بدات، هۆی ئەو دواكەوتنە چییە؟ ئایا دانوستانەكان كاتی زۆریان پێویستە یان ئاستەنگێك دروست بووە لە بەردەم یەكگرتنەوەكەدا؟
ئەو یەكگرتنەوەیە هەم ویستی خەڵك و هەم ویستی ئەندامان و دۆستانی حزبی دیموكراتە، بەڵام بمانەوێ و نەمانەوێ بابەتێكی لەو شێوەیە لە بواری تەكنیكییەوە كاتی دەوێت و هاوكات پێویستی بە دیالۆگی چڕوپڕ و لەیەك تێگەیشتن هەیە، دواجار تا دەگەین بە گەڵاڵەیەكی هاوبەش بۆ یەكگرتنەوەكە، رەوتەكە هەر بە گوڕ و تینی پێشوو بەردەوامە و سبەی كۆبوونەوەیەكی تری نێوان هەردوولامان لەبارەی ئەو پرسە بەڕێوە دەچێت.
هیواشمان وایە لەسەر خاڵەكانی تر، بگەینە ئەنجام و بە هەنگاوێكی ئەرێنییەوە پرۆسەی یەكگرتنەوەكە خێراتر بكەین.
* هەندێك بابەت هەبوون وەك ئەوەی كام یەك لە تەلەڤزیۆنەكان ببن بە زمانحاڵ و ئۆرگانی فەرمی دیموكراتی یەكگرتوو كە تا ئاستێك دانوستاندنەكانی بۆ یەكگرتنەوە خاو كردبووەوە، ئەو پرسانە چارەسەر بوون و توانیتان ئەو قۆناغە بەجێ بهێڵن؟
ئەو پرسانەی كە تا ئێستە خوێندنەوەمان بۆیان جیاواز بووە، لە هەموویاندا گەیشتووینەتە ئەنجام و هیواشمان وایە لەسەر خاڵەكانی تر كە رەنگە لە داهاتوودا بێنە پێشەوە، بگەینە ئەنجام و بە هەنگاوێكی ئەرێنییەوە پرۆسەی یەكگرتنەوەكە خێراتر بكەین.
* ئیرادەیەكی بەهێز لەناو ئەندامانی هەردوولا دەبینرێت بۆ یەكگرتنەوە، رێكخستنەكانتان چۆنیان پێشوازی لەو بابەتە كردووە؟
ئیرادەی گشتی رێكخستنەكانی حزبی دیموكرات بەگشتی و خەڵكی كوردستان و دۆستانی حزب، داواكارن ئەو یەكگرتنەوەیە هەرچی زووە بگاتە ئاكام، واتا ویستی كۆمەڵانی خەڵك و پێویستیی سیاسی رۆژهەڵاتی كوردستان، دەخوازێت یەكگرتنەوە بە خێرایی بگاتە ئەنجام.
* لە رۆژی نەورۆز تیمێك لە پێشمەرگەكانی شاری حدكا لەناو خەڵكدا دەركەوتن، ئایا ئەو چالاكییانە بەردەوامیان دەبێت و بە لەبەرچاوگرتنی ئەوەی خەریكە رەوتی یەكگرتنەوەی دیموكراتیش دەگاتە ئەنجام، بیرتان لەوە كردووەتەوە لەو شێوە چالاكییانەتان لە ناوخۆی رۆژهەڵاتدا بە هاوبەشی هەردوو دیموكرات بەڕێوە ببەن؟
ئەوەی دەگەڕێتەوە بۆ سیاسەتی خەبات و تێكۆشانی ئێمە لە ناوخۆی كوردستان و جموجووڵی ئەندامانی حزبی دیموكراتی كوردستانی ئێران، پێوەستە بەو سیاسەتانەی پێشتر بڕیارمان لەسەر داون، خەبات و تێكۆشانی ئێمە لە ناوخۆی رۆژهەڵاتی كوردستان و لە قووڵایی خاكی خۆمان بەردەوام دەبێت، هەر دانوستانێكیش ئێمە لەگەڵ ئەو هاوڕێیانەمان بیكەین و هەر هەنگاوێكیش لە ئاراستەی بە ئاكامگەیشتنی پرسی یەكگرتنەوە لەلایەن هەردوو لامانەوە بڕیاری كۆتایی لەسەر بدرێت، بێگومان ئەوە بنەمایەكە كە لە سیاسەتی هەردوولامان، پێشتریش دووپاتمان لەسەر كردووەتەوە كە ئامادەییمان لەناو قووڵایی خاكی خۆمان لە رۆژهەڵاتی كوردستان هەبێت و دوای یەكگرتنەوەش هەر پێڕەوی لەو سیاسەتە دەكەین.
بوونی پێشمەرگەی شار بۆ ئێمە یەك لە خاڵە جەوهەرییەكانە بۆ پشتیوانیكردن لە ئیرادەی خەباتگێڕانەی پڕۆسەی خەباتی جەماوەری و مەدەنی
* چالاكییەكانتان لە ناوخۆی رۆژهەڵاتی كوردستان بووە بە سیاسەتی گشتی حدكا و لێی بەردەوام دەبن، یان تەنیا لە بۆنەكان ناوبەناو پێشمەرگە لە ناو خەڵك دەردەكەوێت؟
ئێمە خەباتی راسانی رۆژهەڵات بەڕێوە دەبەین، ئەو خەباتە بریتییە لە خەباتی مەدەنی، خەباتی سیاسی، گرنگیدان بە خەباتی جەماوەری و ئێن جی ئۆیی، دەرەتانی زیاتر رەخساندن بۆ جووڵەی ژنان و خەباتی ژنان و لەقاودانی سیاسەتەكانی رژێمی كۆماری ئیسلامی لە پێشێلكاری مافەكانیان، هەروەها گرنگیدان بە ناوەندەكانی زانستی و فەرهەنگی و زانكۆیی بۆ رووبەڕووبوونەوە لەگەڵ ئەو لۆجیكەی دەیەوێ ئایدیۆلۆجیای شكستخواردووی كۆماری ئیسلامی بسەپێنێت، بەگشتی لە راسانی رۆژهەڵاتدا، بەرگری رەوای پێشمەرگانە یەك لە بنەما سەرەكییەكانە كە لە ئێستە و داهاتوویشدا بەردەوامە، بوونی پێشمەرگەی شار بۆ ئێمە یەك لە خاڵە جەوهەرییەكانە بۆ پشتیوانیكردن لە ئیرادەی خەباتگێڕانەی پڕۆسەی خەباتی جەماوەری و مەدەنی بە هاوئاهەنگی و هاوخەباتی لەگەڵ سەرجەم چین و توێژەكانی رۆژهەڵاتی كوردستان.
بزووتنەوەی كوردستان، پێویستی بە یەكگرتوویی و یەك ئیرادەیی و بەشداری هەموو چین و توێژەكان و گوتارێكی نەتەوەیی و نیشتمانی هەیە
* ئێستە لە ناوخۆی رۆژهەڵاتدا رەوتێك دروست بووە، باس لەوە دەكات دۆخی رۆژهەڵات هی ئەوە نییە چالاكی پێشمەرگانەی تێدا بكرێت، بەشێك لەوانەش كە برەو بەو بیرۆكەیە دەدەن كوردن، ئەو دژایەتییە لەگەڵ بوونی پێشمەرگە و بەتایبەت ئەو راسانەی ئێوە وەك سیاسەت گرتووتانەتە بەر بۆ چییە؟
ئەو تێڕوانینانە دەكرێ لە دوو بەشدا پێناسە بكەین، بەشێكیان ئەوانەن كە دەستەمۆی رژێمی كۆماری ئیسلامی ئێرانن، لە هیچ دۆخێكدا خەباتی كورد و بزووتنەوەی كورد و مافە رەواكانی ئەو نەتەوەیان گرنگی پێ نەداوە، زیاتر كاریان پاساوهێنانەوە بووە بۆ هەڵسوكەوتی رۆژانەیان دەبینرێت بۆ ئەوەی تاوانەكانی رژێمی كۆماری ئیسلامی پاساو بدەن. بەشێكی تریان ئەو رووناكبیر و نووسەر و خوێندكارانەن كە لە خەباتی فەرهەنگی و كولتووری و ئەدەبی و ئێن جی ئۆییدا، كار و تێكۆشانیان هەیە، ئەو بەشە بۆچوونیان بۆ ئێمە جێی رێزە و بە بایەخەوە وەریان دەگرین، بەڵام هەر ئەو بەشەش خۆیان هەست بەو بۆشاییە دەكەن كە لە ئاستی ئۆپۆزسیۆنی ئێرانی بەرانبەر رژێمدا هەیە، هەست بەو بەرپرسیارێتییە دەكەن و لەبەرچاویانە كە بزووتنەوەی كورد ئەگەر بە زیندوویی ماوەتەوە، بەهۆی چالاكیی پێشمەرگانە و بەرگری رەوا و بوونی پێشمەرگەیە لە ناوخۆ، هەروەها ئەو ئیرادە خەباتگێڕانەیە كە لەناو كوڕ و كچانی گەنجدا لە شەقامەكانی رۆژهەڵات بەرانبەر هێزە داپڵۆسێنەرەكانی رژێم دەبینرێت كە لە بۆنە و رێوڕەسمە نەتەوەیی و مێژووییەكان رەنگدانەوەیان هەیە. بەگشتی ئێمە بۆ هەر بۆچوونێك كە لە ئاراستەی راوێژكاری و هاوفكری و هاوخەباتی بێت، لەگەڵ ئیرادەی كادر و پێشمەرگەكانمان و تێكۆشەرانی رێی ئازادی بەدوور لەوەی كە سەر بە كام حزبن و بیر و بۆچوونیان چۆنە، بە بایەخەوە لێیان دەڕوانین، بەڵام راستییەكە ئەوەیە كە بزووتنەوەی كوردستان، پێویستی بە یەكگرتوویی و یەك ئیرادەیی و بەشداری هەموو چین و توێژەكان، لەگەڵ ئەمانەش پێویستی بە گوتارێكی نەتەوەیی و نیشتمانی هەیە كە سەرجەم ئەو پێكهاتانە لە دەوری خۆی كۆ بكاتەوە، بتوانێ گەلی كورد و كاروانی خەباتەكەی بەرەو سەركەوتنی كۆتایی و رووخانی كۆماری ئیسلامی ببات بە ئامانجی بنیاتنانی سیستمێكی دیموكرات و فیدراڵ و سیكۆلار لە ئێراندا، بۆ ئەوەی ویست و داخوازییە نەتەوەییەكانی كورد لە رۆژهەڵاتی كوردستان دەستەبەر بكات.
* رۆژی نەورۆز پێشوازییەكی گەرم لە دەركەوتنی پێشمەرگەكانی ناوشاری حدكا لە رۆژهەڵاتی كوردستان كرا، ئەوە هاندەرتان نابێت بۆ ئەوەی لەمەودوا لەو رووەوە چالاكییەكانتان زیاتر بكەن و زیاتر لە ناوخۆی رۆژهەڵات دەركەوتنتان هەبێت؟
ئێمە بە لێكدانەوەیەكی سیاسیی و كارناسانەوە خەباتی شار و شاخمان بەیەكەوە گرێ داوەتەوە، راستییەكەی هێزی پێشمەرگەی كوردستان ئیرادەی خەباتگێڕانەی كۆمەڵانی خەڵكە و كۆمەڵانی خەڵكیش هێزی لەبن نەهاتووی بزووتنەوەی رزگاری و نیشتمانی كوردستانە، ئەو هێزەیە كە ورە بە پێشمەرگە دەبەخشێت، لە شەقامدا دەتوانێ ببێتە هێزی جەماوەری بۆ دەستەبەركردنی سیاسەتەكانی بزووتنەوەی نیشتیمانی كوردستان و لە هاوئاهەنگیدا دەبێت لەگەڵ هێزی شاخ. بۆ چالاكی پێشمەرگانەش لە ناوخۆی رۆژهەڵاتدا، پێشتر بڕیارمان لێ داوە و ئەوە بەرنامەی سیاسیی ئێمەیە كە ئەویش هاوخەباتی خەباتكارانی شارە لەگەڵ هێزی پێشمەرگەی كوردستان، ئەو هێزە رێكخراوەی ئێستە لەناو چین و توێژەكانی رۆژهەڵات لە قووڵایی خاكی كوردستانن، بەردەوام رۆڵی خەباتگێڕانەی خۆیان بەرجەستە دەكەنەوە.
سەرجەم شێوازەكانی خەبات بە سەرجەم رەهەندەكانەوە، هەركامیان بەپێی سروشتی خۆیان بە گرنگییەوە چاو لێ دەكەین
* ئاماژەت بەوە كرد كە باوەڕتان بە خەباتی مەدەنی و جەماوەری هەیە لە ناوخۆی رۆژهەڵات و وەك شێوازێك لە شێوازەكانی خەبات رێكخستنی بۆ دەكەن، بەڵام لەگەڵ دەركەوتنی هێزی پێشمەرگە لە ناوخۆی رۆژهەڵات، جۆرێك بەگژداچوونەوەی ئەندامان و لایەنگرانتان لە شێوازی خەباتی مەدەنی بە تایبەت لە سۆشیال میدیا دەستی پێ كرد، تا ئاستێك سەركۆنەی ئەو شێوازە لە خەباتیان گرتەبەر، ئێوە چۆن دەتوانن ئەوە رێك بخەنەوە لە ناوخۆی حزب و رێكخستنەكانتاندا كە خەباتی مەدەنیش شێوازێكە لە شێوازەكانی خەبات و بەشێكە لە خەباتی ئازادیخوازانەی كورد لە رۆژهەڵات؟
ئێمە وەك حزبی دیموكراتی كوردستانی ئێران، هیچ شێوازێكی خەبات بەسەر شێوازەكانی تردا فەڕز ناكەین، لە روانگەی ئێمەوە سەرجەم شێوازەكانی خەبات بە سەرجەم رەهەندەكانەوە، هەركامیان بەپێی سروشتی خۆیان بە گرنگییەوە چاو لێ دەكەین، خەباتی پێشمەرگانە و خەباتی مەدەنی و خەباتی رووناكبیری و ئێن جی ئۆیی و سەرجەم شێوازەكانی خەبات، بۆ ئێمە جێی بایەخە و هەنگاویان بۆ هەڵدەگرین و بەرنامەشمان بۆیان هەیە، بۆیە چ خەباتی پێشمەرگانە بێت و چ خەباتی مەدەنی بێت یان ئەدەبی و كولتووری و رووناكبیری بێت، لە روانگەی ئێمەوە خاوەنی ئەو پەیامەیە كە ئامانجە نەتەوەییەكانمان لە رۆژهەڵاتی كوردستان دەپێكن.
بە گشتی ئێمە بڕوامان وایە كە هێزی سەرەكی و ئیرادەی خەباتگێڕانە لە هێزی گەل و جەماوەردایە، ئەزموونی سیاسیی بزووتنەوە نیشتمانییەكانی گەلانی دنیا ئەوەی سەلماندووە كە ئیرادەی جەماوەر زاڵە بەسەر هەموو تەكنیك و تاكتیكێكدا، هەر لە نموونەی فەلەستینەوە تا بەرەی ئازادیخوازی ئێرلەندا و دەیان بزووتنەوەی پێشكەوتنخوازی دنیا، پشتئەستوور بوون بە هێزی جەماوەر و بەرگری چەكدارانەش بەشێك بووە لە خەباتەكەیان، كە لە كوردستان بەپێی سروشتی كارمان و هەڵكەوتە و جیۆپۆلەتیكی كوردستان، هێزی پێشمەرگە هەمیشە پارێزەر و بەدیهێنەری دەستكەوتەكانی بزووتنەوەی نەتەوەیی و نیشتمانی كوردستان بووە، بۆیە خەباتی پێشمەرگانە بە بایەخەوە سەیر دەكرێت و بەشێكی هەرە زۆریشی دەگەڕێتەوە بۆ ئەوەی هێزێكی خاوەن ئیرادەیە لە بەرانبەر پەلاماردەرانی سەر كوردستان.