ئهڤرۆ رۆژا جیهانیا پهنابهرایه و ل سهرانسهرێ جیهانێ چالاكیێن جودا دهێنهكرن بۆ وێ یهكێ گیانێ پهنابهران سلامهت بیت و جهێن شولهژێ خوه ل كێشه و ئاریشهیێن وان بكهن خودان و ئهو ژی ڤهگهرن وهلاتێ خوه، وهلید كوچهر ئێكه ژ وهلاتیێن ههرێما كوردستانێ و دهما دوو سالایه بزاڤێ دكهت بگههیته ئهورۆوپا، بهلێ ل سهر سنورێن توركیا و بلغاریا ژبهر كریارێن توندوتیژی نهشێت دهرباز بیت.
وهلیدی بۆ "وشه" گۆت، من ل كوردستانێ چوو خانی و كار نهبوون، وهختهكێ وهكو كرێكار ل ئێك ژ سهمونخانهییێن دهڤهرا سێمێلێ كار دكر، بهلێ پاشی ئهو كار ژی نهما، هندی دوڤچون ل سهر دهلیڤهكا كاری كر، بهلێ جهێ داخێ یه چوو كار دهست من نهكهفتن، لهوا ب نهچاری من بریار دا كو رێیا قاچاغ بگرم و ئهز و خێزان و زارویێن خوه كوردستانێ بجهـ بهێلین و بچینه ژ دهرڤه.
زێدهتر گۆت، ئهڤه دهما دوو سالایه ئهز و خێزان و زارویێن خوه ل سنورێ دناڤبهرا توركیا و بلغاریا نهشێن دهرباز بین، ژبهركو جهندرمه و سهربازێن ههردوو وهلاتان ب رهنگهكێ دویر ژ مرۆڤایهتی و شارستانی رهفتارێ ل گهل وان كهسان دكهن كو دخوازن ب پهنابهری قهستا دهرڤه بكهن ب تایبهتی ژنان، بۆ نموونه ژنهكا نیاسا من ل گهل ههڤژینێ خوه قهستا دهرڤه كر، ب رێڤه هاتنه گرتن، دهستپێكێ ههموو پاره و زێری و كهلوپهلێ ل گهل لێوهرگرتن، پاشان یاری و ترانه بخوه ب وان كرن، تهنانهت ل بهرچاڤێن زهلامێ وێ ژن رویس كر و ههموو جلوبهرگێن وێ ژبهكرن و یاری و ترانه بخوه ب وان دكرن، پاشان پشتی چهند قوتان و ئێشاندن و خهبهرێن كرێت و رهزیلكرین جارهكا دی زڤراندڤه توركیا داكو ئهو ژی ڤهگهرینن كوردستانێ، ئهڤه پشكهك ژ وان نهخوشیانه كو د رێیا پهنابهریێ دا دكهڤنه رێیا وان كهسان كو دخوازن بچنه ژ دهرڤه، ئهڤه نێزیكێ دوو سالایه ئهز نهشێم دهرباز بم ژبهركو ترسم وهكو ئهڤێ ژنێ و ههڤژینێ وێ ههمبهری من و خێزان و زارویێن من ژی بهێنهكرن، دههان نمونهیێن ئهنجام دانا كریارێن دهستدرێژی و توندوتیژی ههمبهری پهنابهران ههنه.
كوردستان وهلاتێ مهیه و چوو جاران پشت ناكهینێ،
ناڤبری دیاركر ژی كو ئهو دهما ئهو ل كوردستانێ ههر ژ دهستپێكا شهرێ داعشێ ههتا داوی هاتی، هاریكاری گههاندینه ههموو سهنگهرێن پێشمهرگهی و هزاران سامونه ههفتیانه دگههاندن پێشمهرگهی و گۆت ژی، كوردستان وهلاتێ مهیه و چوو جاران پشت ناكهینێ، ههردهم دێ گیانێ خوه بۆ كهینه قوربان، ههر وهلاتهكێ دهستدرێژیێ بكهت سهر دێ بهرسنگی راوستین ئهڤجا ل كوردستانێ بیت یان ژی ژ دهرڤه، بهلێ دهما كو مرۆڤی چوو خوشی و ژیان تێدا نهبیت نهچاره كو ل جههكێ بگهریێت ژیانا وی و زارویێن وی بهێته گهرنتیكرن.
وهلید كو نوكه ل توركیایه و چاڤهرێ دكهت بچیته ژ دهرڤه گۆت ژی، ههتا نوكه پتری 100 جاران من بزاڤ كریه سنورێن توركیا بۆ ئهورۆپا دهرباز بكهم بهلێ هێشتا من نهشیایه ژبهركو من نهڤێت خێزان و زارویێن خوه ژ دهست بدهم، كۆرۆنایێ گهلهك كارتێكرنێن خراپ ل سهر چونا مه كرن ژبهركو ههند ژ روویێ دارایی نهشێن وهكو پێدڤی بچین ههند ژی سنورێن وهلاتان هاتینه توندكرن، ئهڤه زێدهباری كو ل هندهك دهمێن سالێ ژبهر كهشوههوای گونجای نیه مرۆڤ بچیت ب تایبهتی زڤستان و بهارێ.