سەرۆك مەسعوود بارزانی پێشوازی لە دەستەی هەڵبژێراوی كۆنفیدراسیۆنی ڕەوەندی كورد و فیدراسیۆنەكانی ئەندام لەو كۆنفیدراسیۆنەدا كرد.
ئەمڕۆ دووشەم شەشی كانوونی یەكەم، سەرۆك بارزانی پێشوازی لە دەستەی هەڵبژێراوی كۆنفیدراسیۆنی ڕەوەندی كورد و فیدراسیۆنەكانی ئەندام لەو كۆنفیدراسیۆنەدا كرد.
لە دیدارەكەدا سەرۆك بارزانی پیرۆزبایی بەڕێوەچوون و سەركەوتنی كۆنگرەی كۆنفیدراسیۆنی ڕەوەندی كورد لە هەولێر كرد، هەروەها پیرۆزبایی هەڵبژاردنی لە دەستەی كۆنفیدراسیۆنی ڕەوەندی كورد كرد و هیوای سەركەوتنی بۆ خواستن لە ڕێكخستن و هاوئاهەنگیی زیاتر لەناو ڕەوەندی كورد لە تاراوگەدا.
سەرۆك بارزانی ئاماژەی بەوە دا كە دۆزی نەتەوەی كورد لە سەرووی بەرژەوەندی حزب و كەسایەتییەكانە، حزب تەنیا ئامرازێكە بۆ خزمەتكردنی ئامانجێكی گەورەتر.
سەرۆك دووپاتی لە پەیامی ئاشتیخوازی گەلی كورد كردەوە و داواشی كرد كە كۆنفیدراسیۆنی ڕەوەندی كورد، ببێتە هۆكارێكی كاریگەر بۆ ناساندنی جینۆساید و ئەو ستەمەی دەرهەق میلەتی كورد كراوە.
سەرۆك بارزانی رۆشنایی خستە سەر مێژووی بزووتنەوەی رزگاریخوازی كوردستان، ئیرادەی گەلی كورد لە پێناو مانەوە و بەرگریكردن لە ناسنامە و خەبات لە دژی زۆرداری، هەروەها سوپاسی ڕەوەندی كوردی كرد كە لە دووریی وڵاتەوە هەمیشە پاڵپشتی داوا رەواكانی گەلەكەیان بوونە لە قۆناغە جیاجیاكاندا.