پارێزگاری كەركووك بە ئامادەبوونی نوێنەرانی سەرجەم حزب و لایەنە كوردستانییەكان و عێراق ئاگری نەورۆزی هەڵكرد و لە گوتەیەكیدا جەختی لەسەر ئاشتەوایی و پێكەوەژیانی شارەكەی كردەوە.
ئێوارەی ئەمڕۆ 20ی ئادار دكتۆر نەجمەدین كەریم، پارێزگاری كەركووك بە ئامادەبوونی نوێنەرانی سەرجەم حزب و لایەنە كوردستانییەكان و عێراق، ئاگری نەورۆزی لەسەر قەڵای دێرینی كەركوووك كردەوە و لە گوتەیەكدا، پیرۆزبایی لە ئامادەبووان كرد و جەختی لەسەر ئاشتەوایی و پێكەوەژیانی پێكهاتە نەتەوەیی و ئاینییەكانی شارەكە كردەوە و هەڵكردنی ئاڵایەكی گەورەی كوردستانیشی بە مافێكی ئاسایی هەژمار كرد.
دوابەدوای هەڵكردنی ئاڵایەكی گەورەی كوردستان كە بە درێژیی 30 مەتر و پانیی 15 مەتری لە پاڵ ئاڵای عێراق، ئاگری نەورۆزی هەڵكرد و بە چەپڵەڕێزان و گوتنەوەی سروودی نەورۆز دەستپێكی ئاهەنگێكی هونەریی گەورە ڕاگەیەنرا. كەشوهەوای شارەكەش تا ڕادەیەك لەبارە بۆ ئاهەنگ گێڕان و تێكڕای پلەی گەرمیی ئەم ئێوارەیە نزیكەی 15 پلەی سەدییە و ئاسمان نیمچە هەورە و خێرایی با بەرزە.
پارێزگاری كەركووك، بەبۆنەی جەژنی نەورۆزەوە ئەمڕۆی كردە پشووی فەڕمی لەسەرجەم دام و دەزگە حكوومییەكانی شارەكە، و چەند ڕۆژێكە بڕیاری هەڵكردنی ئاڵای كوردستان لەسەر فەرمانگە حكوومییەكان كاردانەوەی جیاوازی لێكەوتووەتەوە و چاوەڕوان دەكرێت لە كۆبوونەوەی داهاتووی ئەنجوومەنی پارێزگەی كەركووك بڕیاری یەك جارەكیی لەسەر بدرێت.
كەركووك – نەبەز ڕۆستەم