نێچیر هه‌ورامی كار بۆ "په‌ندی پێشینان" ده‌كات

:: PM:03:33:16/05/2022 ‌
هونه‌رمه‌ندی لاوی هه‌ڵه‌بجه‌یی نێچیر هه‌ورامی، كاری نوێترین كلیپی ته‌واو كرد به‌ناوی "په‌ندی پێشینان"، ئه‌وه‌ش نوێترین به‌رهه‌مێتی بڵاوی ده‌كاته‌وه‌.

هونه‌رمه‌ند نێچیر هه‌ورامی له‌ واڵی تایبه‌تی خۆیی له‌ تۆڕی كۆمه‌ڵایه‌تی فه‌یسبووك، نوێترین كاری خۆی له‌گه‌ڵ كۆمه‌ڵێك وێنه‌ بڵاو كردووه‌ته‌وه‌ و هه‌ندێك زانیاریی ئاشكرا كردووه‌.

نیچیر هه‌ورامی له‌ یوتیوبی تایبه‌تی خۆی، نوێترین كلیپی به‌ناوی "په‌ندی پێشینان" بڵاو كردووه‌ته‌وه‌، تا ئێسته‌ زیاتر له‌ 13 هه‌زار بینه‌ری هه‌بووه‌. له‌باره‌ی به‌رهه‌مه‌كه‌یش نووسیویه‌تی، "به‌ڵێنم پێدان به‌رھه‌مێك دروست بكه‌م كه‌ شایه‌نی ھه‌موو ته‌مه‌نێك بێ، ڕه‌نگدانه‌وه‌ی ژیان بێ، بۆیه‌ په‌ندی پێشینان ئه‌و به‌رھه‌مه‌یه‌ كه‌ شایه‌نی چاوه‌ڕوانیتانه‌، به‌دڵبوونی ئێوه‌ گشت ھیلاكییه‌كی ئه‌م به‌رھه‌مه‌م ده‌ڕه‌وێنێته‌وه‌".

تێكستی گۆرانییه‌كه‌ له‌ په‌نده‌كانی شاعیری گه‌وره‌ی كورد پیره‌مێرده‌وه‌ وه‌رگیراوه‌، ئارش عوسمان ئاوازه‌كه‌ی بۆ داناوه‌، ئالان حوسێن و هۆگر كاری ده‌رهێنانی كلیپه‌كه‌یان بۆ ئه‌نجام داوه‌. ڤیدیۆ كلیپه‌كه‌ له‌ هه‌ولێر و له‌ناو قه‌ڵادا كاره‌كانی بۆ كراوه‌.

نێچیر هه‌ورامی ساڵی 1987 له‌ شاری هه‌ڵه‌بجه‌ له‌ دایك بووه‌، ساڵی 2009 ده‌ستی به‌ كاری هونه‌ری كردووه‌، خاوه‌نی چه‌ندا كلیپه‌ و زیاتر به‌ هونه‌رمه‌ندێكی میلی ناسراوه‌، دوا به‌رهه‌می به‌ناوی "Xanm U Xatun"  دوو مانگ پێش ئێسته‌ بڵاوی كرده‌وه‌.




وشە - محەمەد میران