قایمقامیەتی ناوەندی سلێمانی هاوردەكردنی چەند بەروبوومێكی سنوردار كرد و رای گەیاند، بۆمانگی نیسان بەشێوەیەكی گشتی هاوردەكردن بەهۆی زۆری بەروبوومی ناوخۆیی كەمدەكرێتەوە.
ئەمڕۆ دووشەم 27ی ئاداری 2017 قایمقامیەتی ناوەندی سلێمانی راگەیەنراوێكی بڵاوكردەوە و تێیدا هاتووە، لیژنەی دیاریكردنی بەروبومی ئاژەڵی و پەلەوەری پارێزگای سلێمانیدا كۆبۆوەو پاش هەڵسەنگاندن بۆ ئاستی بەرهەمهێنانی بەروبومی ناوخۆیی و خواستی هاووڵاتیان، بڕیاردرا پێداچونەوە بەبڕی هێنانە ناوەوەی ئەو بەروبووم و پێداویستیانەدا بكرێت كە هاوردەی سلێمانی دەكرێت بۆ مانگی نیسان.
لەراگەیەنراوەكەدا هاتووە، بۆ مانگی نیسان هاوردەكردنی هەزار تۆن گۆشتی مریشكی بەستوو هاوردەكردنی 550 تۆن گۆشتی ماسی و گۆشتی سور و 600 تۆن هێلكەی مریشك رێگەی پێدەدرێت.
قایمقامیەتی ناوەندی سلێمانی ئاماژەی داوە، بەروبوومە هاوردەكراوەكان رێژەكەی بەهۆی زۆری بەرهەمی ناوخۆی بۆ ئەومانگە كەمكراوەتەوە.