ده‌ورۆبه‌رێن سالا 1983 ژبه‌ر درۆستبوونا ئالوزیان دناڤبه‌را پارتا كرێكارێن كوردستان و توركیا، پشكه‌ك ژ گونده‌وارێن سنووری دناڤبه‌را باكوور و باشوورێ كوردستانێ شه‌ر و ئالوزی دروست بوون، پاشان رووبه‌رێ وان ئالوزیان مه‌زنتر بو، د نوكه دا ب گوره‌ی تورا هه‌ماهه‌نگی یا رێكخراوان، 591 گوندێن پارێزگه‌ها دهۆكێ هاتینه چولكرن و زیانێن زۆر یێن گیانی و ماددی به‌ر وه‌لاتیان كه‌فتنه.
سێ سالان بەری نوکە خه‌لكێ دێره‌لووك و شێلادزێ، خوه‌نیشاندانه‌ك ئه‌نجام دا
سێ سالان بەری نوکە خه‌لكێ دێره‌لووك و شێلادزێ، خوه‌نیشاندانه‌ك ئه‌نجام دا و پاشان چونه سه‌ر باره‌گایێ توركیا ل كومه‌لگه‌ها سیریێ، دخوه‌نیشاندانان دا خه‌لكی داخوازكر كو هه‌ند پارتا كرێكارێن كوردستانێ ل ده‌ڤه‌رێ ڤه‌كێشیت، هه‌ند توركیا بۆردمانكرنا گونده‌وار و شه‌هید و برینداركرنا خه‌لكی رابگریت، داكو ئه‌و بشێن ڤه‌گه‌رن سه‌ر گونده‌وارێن خوه و ده‌ست ب ژیانه‌كا نوو بكه‌ن و ئه‌من و ئاسایشا ده‌ڤه‌رێ ژی بهێته پاراستن، هه‌ردسان چاره‌نڤیسێ وان هه‌ردوو پێشمه‌رگه‌یان ژی دیار بیت كو رێكه‌فتی 21/1/2019 ل گه‌لیێ ره‌شاڤه ژلایێ باله‌فرێن توركیا هاتینه بۆردمان كرن و هه‌تا نوكه چاره‌نڤیسێ وان نه‌دیاره، به‌لێ هه‌تا نوكه چوو ژ وان داخوازیان نه‌هاتینه بجهئینان.
مریه‌م ئیسماعیل، هه‌ڤژینا وه‌حید عه‌بدولباقی، ب ئه‌گه‌رێ بۆردمانێن توركیا ئه‌ڤه پتری سێ ساله چاره‌نڤیسێ هه‌ڤژینیێ وێ نه‌دیاره بۆ "وشە" گۆت، رێكه‌فتی 21/1/2019ێ هه‌ڤژینێ من ل گه‌ل سێ هه‌ڤالێن خوه ب مه‌ره‌ما گرتنا ماسیان قه‌ستا گه‌لیێ ره‌شاڤه كر، هه‌ر چه‌نده ب دلێ من نه‌بوو بچن ژبه‌ركو ده‌ڤه‌ره‌كا دویربوو و سه‌رما بوو و مه‌ترسی ل سه‌ر ژیانا وان هه‌بوو ب تایبه‌تی ژلایێ بۆردمانێن توركیا، چونكی ده‌ڤه‌ر دهاته بۆردمان كرن، به‌لێ د پێناڤ خودانكرنا زاروكێن خوه و په‌یداكرنا پاریێ ژیانێ ئه‌وی گوهداریا من نه‌كر و چوونه گه‌لیێ ره‌شاڤه، جهێ داخێ یه پشتی سێ رۆژان نووچه‌یێ بۆردمانكرنا وان هاته به‌لاڤكرن.
زێده‌تر گۆت، ته‌رمێ دوو ژ هه‌ڤالێن وی هاتنه زڤراندن، به‌لێ هه‌ڤژینێ من و هه‌ڤاله‌كێ وی كو هه‌ردوو ژی پێشمه‌رگه‌نه، چاره‌نڤیسێ وان نه‌دیاره، ئه‌ڤه دوو سال بورین و هێشتا ئه‌م تشته‌كێ ژی نوزانین، ئه‌م دخوازین جهێن شوله‌ژێ چاره‌نڤیسێ وان دیار بكه‌ن، چ مری بن یان ساخ داكو ئه‌م ژی ئارام بین و چاڤێ مه ل رێیا وان نه‌بیت و زاروكێن من ژی به‌س بكه‌ن گری و پرسیارا بابێ خوه بكه‌ن.
بۆردمانا باله‌فرێن توركیا رۆژ بۆ رۆژ به‌رده‌وامه و دەمێ هەیڤەکێ یە ب دژواری چەند ناوچەیێن سنورێ دەڤەرا ئامێدیێ ب چری بخوڤە گرتی و وەلاتی نەشێن ژ جادا گشتی و چارچوڤێ گوند وجهێن ئاڤەدانی دوربکەڤن.
رۆژان ژی به‌ری نوكه چه‌ند ده‌ڤه‌رێن هه‌رێما كوردستانێ
مێهڤان رێکانی، چالاکڤانەکێ شێلادزێ بو "وشە" گوت، ، دیاره بۆردمانێن توركیا و دروستبوونا ئالوزیان دناڤبه‌را وان و پاركا كرێكارێن كوردستانێ، زیان بۆ خه‌لكێ ده‌ڤه‌رێ ب تایبه‌تی بۆ سنوورێ ناحیا شێلادزێ هه‌بویه، دده‌ما بوری دا 85 گوندێن سنورێ ناحیا شێلادزێ ژ ئه‌گه‌رێ شه‌ر و ئالوزی و بۆردمانان هاتین چولكرن و خه‌لك نه‌شێت بچته سه‌ر گونده‌وارێن خوه و ژیان ل خەلکێ دەڤەرێ هاتیە تێکدان و ئێدی دەرکەفن ژ مال و جهێن ئاڤەدانی زەحمەت کەفتیە و راستەوخۆ کارتێکرن هەیە کو بهێنە شەهیدکرن.
پشتی خوه‌نیشاندانێن شێلادزێ ل ده‌ستپێكا سالا 2019ێ هه‌تا نوكه، شەش وه‌لاتیان ل ناحیا دێره‌لووكێ، شەش وه‌لاتیان ل ناحیا شێلادزێ، وه‌لاتیه‌كێ ژی ل ناحیا كانی ماسێ گیانێ خوه ژ ده‌ستدایه، دیسان سێ وه‌لاتی ژی ل ناحیا چه‌مانكێ برینداربووینه، كوما گشتی یا شه‌هید و بریندارێن ده‌ڤه‌را ئامێدیێ گه‌هشته پتری 42 شه‌هید و 15 برینداران، ئه‌ڤه زێده‌باری چولبوونا پتری 591 گوندێن ده‌ڤه‌را ئامێدیێ.
پێشتر د لیدوانەکێ دا بۆ وشە عومەر ئورەیی، بەرپرسێ لقێ پارتی ل ئامێدیێ گوت، بەری نوکە مە خەلکێ خوە وەسا رازی دکرن کو نەبنە شەهید و بریندارێن روودانێن تورکیا و پەکەکێ کو نەچنە جهێن دویر و گوندێن سنوری، بەلێ نوکە بۆردان و شەر و ئالوزیێن وان هاتینە جهێن ئاڤەدانی و ناڤا گوند و دەڤەران، لەوا ئەم نەفرەتا ل هەردوا دکەین و دڤێت ئەو تەسفیا حساباتێن خوە ڤەگوهێزن ناڤا ئاخا خوە.