تەڵعەت تاهیر حەمەدعەلی دەوڵەت بەرقەراری و چەسپاندنی دیموکراسییە

لە درێژەی هەڵمەتەكانی بانگەشەكردن و پاڵپشتیكردن لە پرۆسەی ڕیفراندۆمی هەرێمی كوردستان بەرەو سەربەخۆیی، نووسەرانیش بە سەرنج و تێبینی، ڕای خۆیان دەردەبڕن.

تەڵعەت تاهیر حەمەدعەلی، جێگری ڕاگرایەتی کۆلێژی و مامۆستای زانکۆ، لە بارەی پاڵپشتیی ڕیفراندۆمەوە بە "وشە"ی ڕاگەیاند: بەدڵنیاییەوە ئەم گشتپرسیە بۆ بنیاتنانی پایەکانی دەوڵەتی کوردی بایەخ و گرنگی خۆی هەیە و بە پێچەوانەی ڕای نەیاران، دەبێتە فاکتەری لێکنزیکبوونەوەی وڵاتانی پڕ ئاریشە و کێشەی ناوچەکە، کە لێوان لێوە لەپێشێلکردن و پشتگۆخستنی مافەکانی مرۆڤ و مافی نەتەوەکان و ئایین و ئایینزاکان."

زیاتر گوتی: "دەوڵەت، فاکتەری بەرقەراری و چەسپاندنی بنەماکانی دیموکراسی و مافی مرۆڤ و دواجار دروستکەری دامەزراوە و ئۆرگانی فەرمی و یاسایییە، کە تیایدا وێڕای ڕەخساندنی هەل و دەرفەتی یەکسان بۆ بەشداری پسپۆڕان لە کایەکانی سیاسی و ئابووری و پەرەردە و کۆمەڵایەتی دەبێتە هۆی بنبڕکردنی گەندەڵی و چەسپاندی یاسا و دادپەروەری و بەرەو کەناری ئارامی پێکەوە ژیان هەنگاو دەنێن."

ئەم مامۆستایەی زانکۆ دووپاتیشی کردەوە: "ڕاستییەکەی، زۆر گرنگە چەمکەکانی دەوڵەت و حکوومەت لێک جیا بکرێتەوە و تاوەکوو کیان و دەوڵەتێکی سەربەخۆ نێتە ئاراوە، حوکمڕانی دادپەروەرانە، کە لە خزمەتی بەرژەوەندییە باڵای کوردستان بێت نایێتە ئاراوە، بۆیە هەمووان وێڕای تێبینی و هەڵوێستەمان لە سەر شێوازی حوکمڕانی ڕابردوو بە پەرۆشەوە دەبێت بەرەو کۆماری کوردستان هەنگاو بنێین و لە ژێردەستەیی ڕزگارمان بێت."