رووداوێكی تەقینەوە لە بازیان پێنج قوربانی لێ كەوتەوە
لە كارگەیەكی توانەوەی ئاسن لە سنووری شارەدێی بازیان تەقینەوەیەك ڕووی دا و بەو هۆیەوە كەسێك گیانی لە دەست دا و چوار كرێكاری تریش بریندار بوون كە سەرجەمییان هیندستانین.
ئێوارە ئەمڕۆ چوارشەم 27ی ئەیلوول، رائید ئیقبال عەلی گوتەبێژی پۆلیسی شار و شارۆكەكانی سلێمانی بە "وشە"ی ڕاگەیاند، تەقینەوەیەك لە كارگەی "سلێمانی ستیل" رووی داوە و بەو هۆیەوە پێنج هاووڵاتیی بوونەتە قوربانی و یەكێك لەوانە گیانی لەدەست داوە.
زیاتر گوتی، كارگەكە تایبەتە بە تواندنەوەی ئاسن و لە كورەی كارگەكە تەقینەوەكە رووی داوە بەهۆی زۆر گەرمبوونی پارچەیەك ئاسنەوە.
ڕوونی كردەوە كە ئەو كرێكارانەی بوونەتە قوربانی سەرجەمیان هندستانین و ئێستە تەرمی ئەو كرێكارەی گیانی لەدەست داوە لە پزیشكی دادوەرییە، تیمەكانی بەڵگەی تاوان لێكۆڵینەوە لە رووداوەكە و هۆكارەكەی دەكەن.
وشە -
سه‌رخێڵ هاشم