له ناوچه‌یه‌كی جه‌زائیر، كاتێك هه‌ر منداڵێك بۆ یه‌كه‌مجار به‌ڕۆژوو ده‌بێت، له لایه‌ن خێزانه‌كه‌یه‌وه ڕێز له ڕۆژووه‌كه‌ی ده‌گیرێت و ئاهه‌نگێكی گه‌وره‌ی بۆ ساز ده‌كه‌ن.
خێزانی ئه‌مازیغییه‌كان كه دانیشتووی ناوچه خێڵه‌كییه‌كانی جه‌زائیرن، ڕۆژووگرتنی یه‌كه‌مجاری منداڵه‌كانیان به ڕووداوێكی زۆر مه‌زن و پیرۆز داده‌نێن، بۆیه له كاتی یه‌كه‌م ڕۆژووی ته‌مه‌نیدا، ته‌واوی خزم و ناسیاوه‌كانیان بانگ ده‌كه‌ن و به‌ربانگ به ڕازاوه‌ترین و جوانترین شێوه ده‌كه‌نه‌وه.
كاتێك منداڵه‌كه به‌ڕۆژوو ده‌بێت، باوك ده‌بێت بیباته بازاڕ و هه‌موو ئه‌و شتانه‌ی بۆ دابین بكات كه حه‌زی لێیه‌تی له به‌ربانگدا بیخوات، له‌گه‌ڵ ئه‌وه‌شدا چه‌ند خواردنێكی كولتووری هه‌یه كه هه‌ر ده‌بێت له به‌ربانگه‌كه‌یاندا هه‌بێت و چه‌ندان جۆری جیاواز خوانی ڕازاوه بۆ ئاهه‌نگه‌كه‌یان ئاماده ده‌كه‌ن.
دوای نانخواردن و به‌ربانگكردنه‌وه‌ش، پیاوان منداڵه‌كه له به‌رزایی سه‌ربانی ماڵه‌كه داده‌نێن، بۆ ئه‌وه‌ی بیسه‌لمێنن ئه‌م منداڵه قۆناغی منداڵی تێپه‌ڕاندووه و ده‌ستی كردووه به پابه‌ندبوون به بنه‌ماكانی ئاینی ئیسلام.
ژنه‌كانیش هه‌موو كۆ ده‌بنه‌وه و دیاری جۆراوجۆر بۆ منداڵه‌كه ده‌هێنن، هه‌ر كه‌سه و به پێی نزیكی و ناسینی منداڵه‌كه، باسێكی تایبه‌تمه‌ندی و زیره‌كی منداڵه‌كه ده‌كات و ڕێزی لێ ده‌گرن، ئاهه‌نگه‌كه‌شیان تا دره‌نگانێكی زۆری شه‌و به‌رده‌وام ده‌بێت.
یادكردنه‌وه‌ی یه‌كه‌م ڕۆژووی منداڵه‌كه‌ش مه‌رج نییه له هه‌مان ڕۆژدا بێت، خێزانی منداڵه‌كه به پێی توانا و كاتی گونجاوی خۆیان ئه‌م یاده ده‌كه‌نه‌وه، زۆربه‌ی خێزانه‌كانیش حه‌ز ده‌كه‌ن له شه‌وی 27ی ڕه‌مه‌زاندا بیكه‌ن، تا پیرۆزی شه‌وه‌كه ببێته دوو خۆشی بۆیان.