دوا بڕیارەكەی گریزمان ئاشكرا كرا


سەرچاوە رۆژنامەوانییەكان ئاشكرایان كرد كە ئەنتوان گریزمانی ئەستێرەی فڕەنسی بڕیاریداوە بۆ وەرزی داهاتوو هەر لە ریزی یانەی ئەتلەتیكۆ مەدرید بمێنێتەوە و نەچێتە یانەی بەرشەلۆنە.

كۆواری (فڕانس فوتباڵ)ی فڕەنسی ئاشكرای كرد: گریزمان ئەمڕۆ پێنجشەم بڕیاری مانەوە لە یانەی ئەتلەتیكۆ مەدرید دەدات دوای ئەوەی یانەكە رازی بوو لەسەر زیادكردنی مووچەی ساڵانەكەی بۆ 26 ملیۆن یۆرۆ.

سەرچاوەكە ئاشكراشی كرد، گریزمان گرێبەستێكی نوێ لەگەڵ یانەی ئەتلەتیكۆ مەدرید ئیمزا دەكات و تێیدا مەرجی هەڵوەشاندنەوەكەی پووچەڵ دەكاتەوە كە دەبێتە 100 ملیۆن یۆرۆ.

گریزمان كورتە ڤیدیۆیەكی لە لاپەڕەی تایبەتی خۆی لە تۆڕی كۆمەڵایەتی (تویتەر) بڵاو كردبووەوە و تێیدا ئاماژەی بەوەدابوو كە ئەمڕۆ پێنجشەم لەچەند سەعاتی دهاتوودا بڕیاری كۆتایی دەدات سەبارەت بەمانەوە یان رۆیشتن لە یانەی ئەتلەتیكۆ مەدرید.

ماڵپەڕی (سپۆڕت)ی كەتەلۆنی ئاماژەی بەوەدابوو كە بەرپرسانی یانەی بەرشەلۆنە هیوای تەواویان هەبوو كە گریزمان بڕیاری پەیوەندیكردن بە یانەكەیانەوە دەدات و ریزی یانەی ئەتلەتیكۆ مەدرید جێدێڵێ.

جۆسیپ ماریا بارتومیۆی سەرۆكی یانەی بەرشەلۆنە گرینگییەكی رادەبەدەری بە گرێبەستەكەی گریزمان دابوو و خۆی سەرپەرشتی كارەكانی دەكرد و بڕیاریدابوو بەهەر نرخێك بێت گرێبەستی ئەم ئەستێرە فڕەنسییە بۆ وەرزی داهاتووی یانەكەی بەدەست بێنێ.




وشە - ئامانج ئه‌كره‌م


PM:03:09:14/06/2018




ئه‌م بابه‌ته 548 جار خوێنراوه‌ته‌وه‌‌