سلێمانی جارێكی تر بەو هەنگاوانەی دەیهاوێ، دەیسەلمێنێت كە لەژێر هەژموونی ئێراندایە و زۆربەی ئەو ڕێوڕەسمانەی كە لای ئێران پیرۆزن، لە سلێمانی دووبارە دەكرێنەوە. زۆر جاریش یادكردنەوەكان ڕەخنەی توندی بەدوادا دێت.
بەهۆی ئەو هەژموونەی ئێران لەو سنوورەدا هەیەتی، بەبێ گوێدانە پەیامەكانی سلێمانی، نەریتەكانی ئێرانی تێدا دووبارە دەكرێتەوە و لە دوایین هەنگاویشدا دوا هەینی مانگی ڕەمەزان ڕێوڕەسمی بۆ ڕۆژی قودس كرد لە سلێمانی كە چەندان پەیامی لە پشتەوە بوو.
ڕۆژی جیهانی قودس، رۆژێكە بۆ یادكردنەوەی قودس دانراوە، گوایە لەو رۆژەدا لەلایەن ئیسرائیلەوە داگیر كراوە. ئەو رۆژە لە دوا هەینی مانگی رەمەزان دەكرێت، نە بۆنەیەكی ئاینییە و نە نیشتمانی، زۆر لە عەرەب بایەخی پێ نادەن، تەنیا گرووپە شیعەكان نەبێت، هاوكات بۆ یەكەمجار كۆماری ئیسلامی ئەم بۆنەیەی پێشنیار كردووە.
ئەندامێكی مەكتەبی سیاسیی حزبی زەحمەتكێشانی كوردستان، دەڵێ، لە كاتێكدا كوردستان ڕووبەڕووی چەندان كۆمەڵكوژی و جینۆساید بووەتەوە و كوردانی ڕۆژهەڵات و رۆژئاوا و باكور تا ئێستە بەدەست چەندان كێشەی سیاسییەوە دەناڵێنن، ناكرێت ئەوان لە بیر بكرێن و یادی قودس بكرێتەوە.
بەختیار مستەفا بۆ "وشە" گوتی، بە سیاسیكردنی یادكردنەوەی ڕۆژی قودس و یادكردنەوەی لە هەرێمی كوردستان پەیامێكی سیاسییە، لە كاتێكدا كورد لە عەفرین و كۆبانێ و ڕۆژهەڵاتی كوردستان سەتان قوربانی داوە. بەگوتەی مستەفا "هەقە یادی ئەوانە بكرێتەوە كە نە لەناوی كوردستان نە لە ڕای گشتیی جیهانی گرنگی ئەوتۆی پێ نادرێ".
بەختیار پێی وایە كە ئەوە دروستكردن و ئاماژەدانە بە بەرەیەكی دژ بە ئیسرائیل و ئەمەریكا بۆ پشتگیریی خواستەكانی ئێران كە كاری هەرێمی كوردستان نییە ببێت بە بەشێك لە پشتگیریی ئێران.
ئەندامەكەی مەكتەبی سیاسیی زەحمەتكێشان كە یەكێكیشە لە نووسەرە چەپەكانی كوردستان، پێی وایە، شتێكی بێ مانایە لەژێر فشار و هەژموونی ئێران نەریتەكانی ئەوان دووبارە بكرێتەوە كە خۆی دابڕاندنی سلێمانییە لە كوردستان بەلای ئێراندا، لە كاتێكدا ئەمەریكا ئێستە لە گۆڕەپانی سیاسیی هەرێمی كوردستانە.
"كارێكی مەترسیدارە شارێكی كوردستان بخرێتە بەرەیەكی دژی ئەمەریكا و ئیسرائیل و دواتر هاووڵاتییانی باجەكەی بدەن، بۆیە پێویستە پێداچوونەوە بەو هەڵوێستانەدا بكرێت كە لە سلێمانی ڕوو دەدەن". بەختیار مستەفا وا دەڵێت.
بەشێك لە چاودێرانی سیاسیی پێیان وایە، سلێمانی بەڵگەی زیاتری خۆبەدەستەوەدانی بۆ ئێران دەخاتە ڕوو، كاتێك یادی عاشوورا یان رۆژی قودس دەكرێتەوە و بۆ یەكلاكردنەوەی پرسە سیاسییەكانیش بەرپرسە باڵاكانی ئێران لەوێ دەستوەردانی ئاشكرا دەكەن.
موحسین كەریم ئەندامی مەكتەبی سیاسیی حزبی كۆمۆنیستی كرێكاری كوردستان، بۆ "وشە" گوتی، هەندێك یادكردنەوە و جەژن هەن كۆمۆنیست بە هیچ شێوەیەك لەگەڵیاندا نییە، بەڵام ڕێز لەو بۆچوونانەیش دەگرین كە پشتگیری دەكەن، بەڵام یادكردنەوەی ڕۆژی قودس لە سلێمانی كۆمەڵێك پەیامی سیاسیی تێدایە.
ڕوونی كردەوە كە ئێران و وڵاتە عەرەبییەكان بەگشتیی لەسەر دۆزی فەلەستین نان دەخۆن، ئەوەیشی لە سلێمانی دەكرێت تەواوكەری ئەو بۆچوونەیە و سوود لەو بابەتانە دەبینێت.
بەرپرسەكەی كۆمۆنیست سەرسوڕمانی خۆیشی پێشان دا كە ئەو ڕێوڕەسمە ئاینییانەی لە ئێران باون لە سلێمانیش دەكرێنەوە. زیاتر گوتی، "لەم قۆناغەدا پارێزگاری سلێمانی باكگراوندێكی ئیسلامی هەیە و ئێرانیش ڕۆڵێكی گەورەی هەیە بەهۆی ئەوەی حزبەكانی سلێمانی بە دیاریكراوی یەكێتی و گۆڕان، كەوتوونەتە ژێر ئەو هەژموونە".
دووپاتی كردەوە كە كوردستان جارێكی تر لە نێوان ئێران و توركیا بوون بە دوو بەش و لەوەتەی كۆماری ئیسلامی ئێران هەیە، زۆربەی نەریتەكانی بۆ سلێمانی گواستووەتەوە، لە كاتێكدا خۆی لە بنەڕەتدا شارێكی مەدەنی و ڕۆشنبیری بووە.
لای خۆیەوە هەندرێن ئەحمەد نووسەر و ئەندامی مەكتەبی سیاسیی حزبی شیوعی كوردستان، بۆ "وشە" ئاماژەی بەوە دا كە لە كوردستان بەتایبەتی دیارە كە لە بری حكوومەتی هەرێم حزبەكان پێوەندییەكان بەڕێوە دەبەن و ئەوەیش لەسەر پرسە نیشتمانییەكان ڕەنگی داوەتەوە كە نەدەبوو بەمشێوەیە بێت.
ئەوەیشی ڕوون كردەوە كە مەرج نییە رێوڕەسمە ئاینییەكان پێوەستبوون بە وڵاتێكی دیاریكراو دەربخات بارتەقای ئەوەی كە حزبەكان لەسەر پرسە نیشتمانییەكان یەكدەنگ نەبوون و هەنگاوی دژ بەیەك دەنێن.
ئەو نووسەرە ئەوەیشی بە مەترسی زانی كە هەژموونی وڵاتانی دراوسێ ناوچەگەرێتی لە كوردستان دروست بكات.