ئەنجامی ژماردنەوەی بەدەستی دەنگەكانی 40 سندووق لە هەولێر ئاشكرا بوو

پڕۆسەی جیاكردنەوە و ژماردنەوەی دەستی دەنگەكان لە هەولێر بەردەوامە و بەپێی لێدوانی بەرپرسی دەزگای هەڵبژاردنی پارتی دیموكراتی كوردستان تا ئێستە ئەو دەنگانەی لە هەولێر جیا كراونەتەوە، هیچ جیاوازییەكی لەگەڵ ئەنجامە ڕاگەیاندراوەكان نییە.

ئەمڕۆ پێنجشەم پڕۆسەی هەژماركردنەوەی دەنگەكان بە دەست لە هەولێر دەستی پێ كرد و بڕیارە زیاتر لە 200 سندووقی دەنگدان هەژماركردنەوەیان بۆ بكرێتەوە.

لەبارەی بەرێوەچوونی پڕۆسەكە، خەسرەو گۆران بەرپرسی دەزگای هەڵبژاردنی پارتی دیموكراتی كوردستان بە "وشە"ی ڕاگەیاند، پڕۆسەی جیاكردنەوەی دەنگەكان لە هەولێر بەردەوامە تا ئێستە 40 سندووقی دەنگدان بە دەست هەژمار كراونەتەوە.

گۆران گوتی، بەپێی چاودێرانی پڕۆسەكە ئەو دەنگانەی بەدەست جیاكراوەنەتەوە، سەت لەسەتی ئەو ئەنجامە دەرچووەتەوە كە بە فەرمی ڕاگەیەنرابوو، واتە لەنێوان ئەنجامی هەژماركردنی ئەلكترۆنی و ئەنجامی هەژماركردنی دەستی دەنگەكان هیچ جیاوازییەك نییە.

بەرپرسی دەزگای هەڵبژاردنی پارتی دووپاتی لەوە كردەوە كە دەنگەكانی پارتی وەك خۆی ماوەتەوە و هیچ گۆڕانكارییەك ڕووی نەداوە.

هەڵبژاردنی ئەنجوومەنی نوێنەرانی عێراق لە 12ی ئایاری ڕابردوو ئەنجام درا، بەشێك لە حزبە سیاسییەكانی عێراق ناڕازیبوون لەسەر ئەنجامەكەی، دادگای فیدراڵی و پەرلەمانی عێراق بڕیاریان دا كە دەنگەكان بە دەست هەژمار بكرێنەوە بەتایبەت ئەو سندووقانەی سكاڵایان لەسەرە، بەڵام هێشتا ناڕەزایی حزبەكان بەو پرۆسەیە نەڕەویوەتەوە.




وشە - سه‌رخێڵ هاشم


PM:04:08:12/07/2018




ئه‌م بابه‌ته 8136 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌