لەلایەن ڕێكخراوێكی سەر بە نەتەوە یەكگرتووەكان، بڕە پارەیەكی زۆر بۆ خانەی داڵدەدانی ژنانی هەولێر و پەیمانگەی هانا دابین دەكرێت بەمەبەستی دابینكردنی پێداویستییەكانیان.
ئەمڕۆ سێشەم 16ـی تشرینی یەكەم/ ئۆكتۆبەر، لە ڕاگەیەنراوێكی بەڕێوەبەرایەتی گشتی چاودێری و گەشەپێدانی كۆمەڵایەتی هەولێردا هاتووە، رێكخراوی UNHCR بڕی 100 هەزار دۆلاری بۆ دوو پڕۆژەی بەڕێوەبەرایەتی گشتیمان تەرخان كرد.
ئاماژە دراوە، لە كۆبوونەوەی نێوان بەڕێوەبەرایەتییەكە و بەرپرسانی ئەو ڕێكخراوە، باس لەو كەموكوڕییانە كرا لە خانەی داڵدەدانی ژنان و پەیمانگەی هانا بەدی دەكرێن و رێكخراوی UNHCR بڕیاری دا بڕی 100 دۆلار تەرخان بكات بۆ نەهێشتنی ئەم كەموكوڕییانە.
لە كۆتایی ڕاگەیەنراوەكە ئاشكرا كراوە، رێكخراوەكە ئەركی جێبەجێكردنی پڕۆژەكە و ئەندازیارانی بەڕێوەبەرایەتی گشتی چاودێری و گەشەپێدانی كۆمەڵایەتی هەولێر، ئەركی سەرپەرشتیی پڕۆژەكە لە ئەستۆ دەگرن.
خانەی داڵدەدانی ژنان یەكێكە لەو شوێنانەی ئەو ژنانەی لێ كۆ دەكرێتەوە كە هەڕەشەی كوشتنیان لەسەرە و ناتوانن لەناو خێزانەكەیان ژیان بكەن.