"وشه‌" چه‌ند زانیارییه‌كى ناو كۆبوونه‌وه‌كه‌ى پارتى و گۆڕان ئاشكرا ده‌كات

ئه‌مڕۆ شاندى پارتى بۆ پێكهێنانى حكوومه‌تى داهاتووى كوردستان سه‌ردانى بزووتنه‌وه‌ى گۆڕانیان كرد و له‌باره‌ى پێكهێنانى حكوومه‌ت كۆبوونه‌وه‌. كۆبوونه‌وه‌كه‌ كۆتایی نه‌هاتووه‌ و بڕیاره‌ دواى پشوویه‌ك ده‌ست پێ بكه‌نه‌وه‌.

سه‌رچاوه‌یه‌كى ئاگادار له‌ كۆبوونه‌وه‌كه‌ به‌ "وشه‌"ى ڕاگه‌یاند، له‌ كۆبوونه‌وه‌ى ئه‌مڕۆ زۆر به‌ ڕاشكاوى باسى به‌رنامه‌ى داهاتووى حكوومه‌تى هه‌رێمى كوردستان كراوه‌ و بزووتنه‌وه‌ى گۆڕان شه‌ش خاڵى پێشكه‌ش به‌ پارتى كردووه‌.

ڕوونیشى كرده‌وه‌ كه‌ شه‌ش خاڵه‌كه‌ى گۆڕان وه‌ك پاكێجى كارى داهاتوو وایه‌ بۆ حوكمڕانى له‌ كوردستان و پارتیش به‌رنامه‌ى خۆیان خستووه‌ته‌ ڕوو.

سه‌رچاوه‌كه‌ كه‌ به‌رپرسیاریه‌تى له‌ناو گۆڕان هه‌یه‌ ناوه‌ڕۆكى خاڵه‌كانى باس نه‌كرد، به‌ڵام دووپاتى كرده‌وه‌ كه‌ ئه‌وان له‌گه‌ڵ ئه‌وه‌ن حكوومه‌تێكى خزمه‌تگوزار بێت و ده‌سه‌ڵات بۆ پۆسته‌كانى حكوومه‌ت بێته‌ خواره‌وه‌.

به‌پێى زانیارییه‌كانى "وشه‌" ئێسته‌ شاندى نێوان پارتى و گۆڕان له‌ پشوودان و دواتر كۆبوونه‌وه‌كان ده‌ست پێ ده‌كانه‌وه‌ و بڕیاریش دراوه‌ لیژنه‌یه‌كى هاوبه‌ش له‌ نێوان هه‌ردوولا پێك بهێنرێ.

شاندی پارتی دیموکراتی کوردستان، پێکهاتوون لە هۆشیار زێباری، ئازاد بەرواری، جەعفەر ئیمینکی، دڵشاد شەهاب، هێمن هەورامی و فرسەت سۆفی.

هاوكات شانده‌كه‌ى گۆڕان پێكهاتوون لە ئاراس وەلی، عەلی حەمەساڵح، مستەفا سەیدقادر، جەلال جەوهەر، ئاواتی شێخ جەناب، رەئوف عوسمان، جەمال حاجی محەمەد.

پێش كۆبوونه‌وه‌كه‌ "وشه‌" ئه‌و هه‌واڵه‌ى بڵاو كردبووه‌وه‌ كه‌ به‌رپرسێكى گۆڕان ڕاى گه‌یاندبوو، وه‌ك یه‌كێتى بابه‌ته‌كان تێكه‌ڵ ناكه‌ین و باسى پێكهێنانى حكوومه‌ت له‌گه‌ڵ پارتى ده‌كه‌ین.



وشە - سه‌رخێڵ هاشم


PM:12:16:19/12/2018




ئه‌م بابه‌ته 616 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌