ئه‌مڕۆ پێنجشه‌م 11ی ته‌مووز، سه‌عد حه‌ریری سه‌رۆك وه‌زیرانی لبنان له ڕێی پێوه‌ندییه‌كی ته‌له‌فۆنییه‌وه پیرۆزبایی له مه‌سروور بارزانی سەرۆك وەزیرانی هەرێمی كوردستان كرد.
له‌و پێوه‌ندییه ته‌له‌فۆنییه‌دا، سه‌عد حه‌ریری وێڕای پیرۆزبایی له مه‌سروور بارزانی سەرۆك وەزیرانی هەرێمی كوردستان، هیوای سه‌ركه‌وتنی بۆ كابینه‌ی نوێی حكوومه‌تی هه‌رێمی كوردستان خواست و دووپاتى له پته‌وتركردنی پێوه‌ندییه‌كان كرده‌وه.
ڕۆژى چوارشه‌م 10ی تەمووز، مەسروور بارزانی ڕاسپێردراو بۆ پێكهێنانی كابینەی نوێی حكوومەت، لەلایەن پەرلەمانی كوردستانەوە وەك سەرۆكی ئەنجوومەنی وەزیران متمانەی پێ درا و دواتر و تەواوی حكوومەتەكەی متمانەیان وەرگرت. پاشان لە گوتارێكدا ڕای گەیاند، یەكێك لە سەرەكیترین كارەكانی حكوومەتەكەی بریتی دەبێ لە بەرەنگاربوونەوەی گەندەڵی.