سلێمانی.. چەند دیمەنێكی جیاواز و نەخوازراو پێویستی بە هەڵوەستەلەسەركردنە

:: PM:11:02:10/08/2019 ‌

ناو بازاڕی شاری سلێمانی بەهۆی جەژنەوە خۆڵ و خاشاكێكی زۆری لێ كۆدەبێتەوە و شارەوانی سلێمانیش دەڵێت، ئەوانەی خۆڵ و خاشاك بڵاو دەكەنەوە لە ناو شەقامەكان دەستگێڕەكانی ناو شارن و هەرچی پاشماوەی خۆراكە فڕێ دەدەنە ناو شەقامەكان.

ئەمڕۆ شەموو نزار جەلال بەرپرسی بەشی خزمەتگوزارییەكان لە سەرۆكایەتی شارەوانی سلێمانی بە "وشە"ی ڕاگەیاند، پیسكردن و فڕێدانی پاشماوە و خاشاك بە ناو بازاڕ و شەقامەكانی ناو سلێمانی لە لایەن دەستگێڕ و عەرەبانچییەكانی ناو شارەوەیە كە لە دوای سەعات دووی پاش نیوەڕۆ عەرەبانەكانیان ڕادەگرن.

زیاتر گوتی، یاسامان هەیە كە سزا و غەرامەی ئەو كەسانە بكەین كە پاشماوە و خۆڵ و خاشاك لە شەقامەكانی ناو بازاڕ فڕێ دەدەن و سیمای شار تێكدەدەن، بەڵام ئەمە بۆ دوكاندارەكان، ئەوەی جێگەی نیگەرانییە دەستگێڕەكانن ئەو كارە دەكەن.

لە ماوەی سێ ڕۆژی ڕابردوو بەهۆی نزیكبوونەوەی جەژنی قوربان، شەوانە تا سەعات 12 و یەكی شەو بازاڕەكان كراوەن، لە دوای داخستنیان خۆڵ و پاشماوەیەكی زۆری كاغەز و پلاستیك بڵاوەی پێ دەكرێت و سیمای شاری تێكداوە و هاووڵاتییانیش داوای دیاریكردنی سنوورێك دەكەن بۆ ئەو كارانە.

بڕیار محەمەد، گەنجێكی شاری سلێمانییە بۆ "وشە" دەڵێت، شەوان ئەگەر گوزەرێك بە ناو بازاڕی سلێمانیدا بكەیت، هەست ناكەی ئەمە ئەو شارەیە كە لە دەرەوەی باسی لێوە دەكرێت، چونكە سیمایەكی خراپ و شێواوی هەیە، هۆكاریش خەڵكەكە خۆیەتی.

زیاتر گوتی، ئەگەر هاووڵاتی وشیار نەبێت و شارەكە پارێزراو نەكات و ژینگەكەی تێك نەدات، ئەو حاڵەتە ڕوونادات، بۆیە دەكرێت ڕێگری لە تەواوی ئەو كەسانە بكرێت كە بەو شێوازە سیمای شار تێكدەدەن.

 بەرپرسی خزمەتگوزاری شارەوانی سلێمانی زیاتر گوتی، چەندین جار داوامان كردووە دەستگێڕەكانی شەقامی مەولەوی تا بەردەم مزگەوتی گەورە لاببرێن، چونكە ئەوان سیمای شاریان تێكدا، لە كاتێكدا ڕێگەیان پێدەدرێت لەسەر شەقامەكە كاسپی خۆیان بكەن، بەڵام بەو جۆرەی لێدەكەن.

دوپاتی كردەوە، دوكاندار ئەگەر ئەو كارە بكات غەرامە دەكرێت و ئێستاش بەردەوام دوكاندارەكان سزا دەدرێن بەهۆی ئەو كارە، بەڵام دەستگێڕ نە ناسنامەی پێیە، ئەگەر داوای غەرامەشی لێ بكەی پارەی پێ نییە بیدات.

هەورامان ڕەحیم، مامۆستایەكەو بە "وشە"ی ڕاگەیاند، پیسبوونی ناو بازاڕی سلێمانی دیاردەیەكە و هەموو شەوێك دووبارە دەبێتەوە، ئێستە كە بەرە جەژنانە و تا درەنگ بازاڕەكان كراونەتەوە، ڕۆژانی ئاسایی لە دوای سەعات شەش بۆ حەوتی ئێوارە هەمان شێواز لە ناو بازاڕ هەیە.

زیاتر گوتی، هەر خۆمانین بە دەستی خۆمان سیمای شار تێكدەدەین دواتر لایەنی پێوەندیدار و حكوومەت بە كەمتەرخەم خەتابار دەزانین.

سلێمانی/ هۆشیار عەلی







وشە - مه‌حموود ئیسماعیل

ئه‌م بابه‌ته 153 جار خوێنراوه‌ته‌وه‌‌