پەرلەمانتارێكی فراكسیۆنی پارتی لە ئەنجوومەنی نوێنەرانی عێراق زانیاری لە بارەی چوونی شاندێكی باڵای هەرێم بۆ بەغدا دەخاتەڕوو ئاشكرای دەكات كە دوای رێككەوتنی نێوان بەغداو هەرێم بەشە بودجەی هەرێم بۆ دوو هێندە زیاد دەبێت.
ئەمڕۆ شەموو 17ی ئاب، مەیادە محەمەد ئەندامی ئەنجوومەنی نوێنەرانی عێراق لە فراكسیۆنی پارتی بە "وشە"ی راگەیاند، لە دوو ڕۆژی داهاتوو شاندێكی باڵای حكوومەتی هەرێم بۆ گفتوگۆكردن لەسەر سەرجەم پرسە هەڵواسراوەكانی نێوانیان دەڕواتە بەغدا.
زیاتر گوتی، شاندەكە گفتوگۆ لەسەر مادەی 140 و كەركووك و ناوچە جێناكۆكەكان و بودجە و نەوت و یاسای نەوت و غاز قسە دەكەن.
بەپێی پڕۆژە یاسای بودجەی 2019 ئەگەر حكوومەتی هەرێم 250 هەزار بەرمیل نەوتی رۆژانەی رادەستی بەغدا بكردایە لە ماوەی ئەو ساڵەدا زیاتر لە 10 ترلیۆن دینار بودجەی بۆ دەهات، بەڵام ئێستە مانگانە 450 ملیا دیناری پێ دەگات.
مەیادە محەمەد گوتی، ئەگەر بەغدا و هەرێم رێكبكەون و هەرێم بڕی دیاریكراوی نەوت رادەستی بەغدا بكات؍ ئەوكات بەپێی یاسای بودجەی 2019 بەشە بودجەی بۆ دەنێردرێت كە دوو ئەوەندەی ئەوەی ئێستەیە.
سلێمانی/ هەستیار عەبدوڵا