جێگری سەرۆكی لیژنەی دەسپاكی لە پەرلەمانی كوردستان ڕای دەگەیەنێت، هەوڵێك بۆ ڕێكخستنەوەی كاروباری مەرزەكان هەیە، بەمزووانە لە ڕێی لیژنەیەكەوە بۆ ڕێكخستن سەردانی مەرزەكان دەكرێ.
لە هەرێمی كوردستان ژمارەیەك مەرزی نێودەوڵەتی و لاوەكی هەن كە بەردەوام جوووڵەی بازرگانی لەگەڵ وڵاتانی دراوسێ تێدایە، بەڵام تا ئێستە گومان لەسەر كارەكانی ئەو مەرزانە هەیە، بەجۆرێك داهات و ڕێوشوێنەكان بە ڕوونی دیار نەكراوە.
سەعید هەركی جێگری سەرۆكی لیژنەی دەسپاكی لە پەرلەمانی كوردستان بە "وشە"ی ڕاگەیاند، یاداشتێك لە پەرلەمانی كوردستان هەیە بۆ ئەوەی كاروباری مەرزەكان ڕێكبخرێتەوە و بڕیارە لە داهاتوویەكی نزیك لیژنەیەكی پەرلەمانی بۆ ڕێكخستنەوەی كارەكانیان پێكبهێنرێ.
ڕوونی كردەوە كە كاری مەرزەكان پێویستی بە ڕێكخستنەوە هەیە بۆ ئەوەی زیاتر شەفاف بكرێن و سوودی گرنگتر بگەیەنن.
پەرلەمانتارەكە ئاماژەی بەوە كرد، تا بەشێوەیەكی مەیدانی سەردانی مەرزەكان نەكەین، نازانین بە چ میكانیزمێك ڕێك دەخرێنەوە و دواتر هەنگاوەكان دیار دەكرێن.