بەرپرسێكی هێزەكانی سووریای دیموكرات رای دەگەیەنێت كە هێزەكانیان بە درێژایی سنوورەكان لەگەڵ سوپای توركیا لە جەنگێكی بەردەوامدان، روانگەی مافی مرۆڤی سووریاش دووپاتی دەكاتەوە كە جەنگ لە هەموو بەرەكاندا بەردوامە.
هەسەدە: سێ شەڕوان و پێنج هاووڵاتی كوژراون
مەرڤان قامیشلۆ، بەرپرسێكی هەسەدە ئەمڕۆ چوارشەم بە "رۆیتەرز"ی راگەیاند، جەنگ لە تەواوی سنوورەكان لەگەڵ توركیا لە نێوان هەسەدە و سوپای توركیا بەردەوامە و ئەوان بەرگری دەكەن، لەوكاتەی هەسەدە لە بەیاننامەیەك لەبارەی زیانی بۆردمانەكانی توركیا ئاماژەی كرد كە سێ شەڕوان و پێنج هاووڵاتی كوژراون و دەیان برینداریش هەیە لەوكاتەی روانگەی سووریا بۆ مافی مرۆڤ ئاماژە بۆ كوژرانی 11 كەس دەكات هەشتیان سڤیلن.
وەزیری بەرگری فڕەنسا: پێویستە هێرشەكە بوەستێت
فلۆرنس بارلی، وەزیری بەرگری فڕەنسا لە تویتەر ئاماژەی كردووە كە هێرشەكەی توركیا مەترسیدارە بۆ ئاسایشی كورد و سوودی بۆ رێكخراوی داعش هەیە كە پێنج ساڵە لەدژی دەجەنگین، بۆیە پێویستە ئەو هێرشە بوەستێت.
روانگەی سووریا: جەنگ و بۆردمان بەدرێژایی سنوورەكانی ناوچەكە گەرمە
رامی عەبدورەحمان بەڕێوەبەری روانگەی مافی مرۆڤی سووریا ئاماژە دەكات كە جەنگەكە بەدرێژایی سنوورەكانی ناوچەكە لەگەڵ توركیا گەرمە. زیاتر گوتی، شەڕ تەنیا لە نێوان سەرێ كانی و گرێ سپی نییە، بەڵكو بۆردمان ناوچەكانی بەری رۆژهەڵاتی رووباری فورات تا بەری رۆژئاوای رووباری دجلەی گرتووەتەوە كە سەتان كیلۆمەترە و بۆردمانی هەردوولا هەیە بەتایبەتی تۆپخانەكانی توركیا بۆ سەر سەرێ كانی و گرێ سپی و برینداری زۆر هەیە و لە قامیشلۆ بەهۆی كەوتنەوە 15 گولە تۆپ خێزانێك بەتەواوەتی بریندارن، هەروەها لە قەحتانییە لە باكوری رۆژهەڵاتی حەسەكە.
عەبدورەحمان دووپاتی كردەوە كە هاوئاهەنگییەكی توركی و سووری و ئێرانی و رووسی لەو ئۆپراسیۆنە لە سایەی چاوپۆشی ئەمەریكا هەیە كە گڵۆپی سەوزی بۆ توركیا هەڵكرد، بۆیە پیلانێك لەو ناوچەیە لەدژی هەسەدە هەیە و توركیا بە سوپای نیشتیمانی سووریا جەنگی هەسەدە دەكات و هەموویان پێشانیان دا كە هێزی داگیركەرن لەو وڵاتەدا.