ئه‌گه‌ر سپیبوونی قژ له حاڵه‌تی چه‌ند تاڵه قژێكه‌وه ڕووی له فره‌وانبوون كرد، ئه‌مه بۆ چه‌ند هۆكارێك ده‌گه‌ڕێته‌وه، كه ئه‌گه‌ر كۆنتڕۆڵی نه‌كه‌ن، ئه‌وا ده‌بێته هۆی ئه‌وه‌ی قژتان به ته‌واوی سپی هه‌ڵگه‌ڕێت و به ته‌واوی پیر ده‌ربكه‌ون.
یه‌كه‌م: هۆكاری بۆماوه‌یی، یه‌كێك له هۆكاره سه‌ره‌كییه‌كانی سپیبوونی قژ، بۆ جیناتی بۆماوه‌یی ده‌گه‌ڕێته‌وه، كه له دایك و باوكه‌وه بۆ منداڵ و نه‌وه‌كان ده‌مێنێته‌وه، ڕه‌نگه ئه‌مه هیچ چاره‌سه‌رێكی نه‌بێ، چونكه سروشتییه و له خانه‌واده‌كان زۆرجار كرۆمۆسۆمی له‌وشێوه‌یه بوونیان هه‌یه و سپیبوونی پێش وه‌خته‌یشی لێ ده‌كه‌وێته‌وه.
دووه‌م: لاوازی سیسته‌می به‌رگری له قژ و پێستی سه‌ر، ئه‌مه‌یان جۆرێكه له نه‌خۆشی، كه به‌هۆی كه‌مبوونه‌وه‌ی سیسته‌می به‌رگری له پێستی سه‌ر و ڕه‌گی قژه‌كان، وا ده‌كات به خێرایی بوه‌رن و دواجاریش ئه‌و قژه‌ی دووباره ده‌ڕوێته‌وه، ڕه‌نگه‌ی سپی ده‌بێت، هه‌ندێجار ڕه‌نگه‌كه‌ی ورده ورده كاڵ ده‌بێته‌وه و دواجار بۆ سپییه‌كی ته‌واو ده‌گۆڕێت.
سێیه‌م: فشاری ده‌روونی، ئه‌گه‌ر سترێس و فشاری ده‌روونیت زۆره، ئه‌مه ده‌بێته هۆی ئه‌وه‌ی تاڵه‌كانی قژت بوه‌رن و ئه‌و قژه‌ی ده‌ڕوێته‌وه، به ته‌واوی سپی ببێت، ئه‌و قسه‌یه باوه كه ده‌ڵێن فڵانه كه‌س خه‌می زۆره و قژی سپی بووه، به‌ڵام له بنه‌ڕه‌تدا كێشه‌كه سترێس و فشاری ده‌روونییه، ده‌نا هه‌موو كه‌س خه‌می هه‌یه بایی ئه‌وه‌نده.
پێویسته ئه‌م هۆكارانه له‌خۆتان دوور بخه‌نه‌وه بۆ ئه‌وه‌ی تووشی خێرا سپیبوونی قژ نه‌بنه‌وه
چواره‌م: پیسبوونی هه‌وا، كه‌شوهه‌وا كاریگه‌ری زۆری له‌سه‌ر قژ هه‌یه و ده‌بێته هۆی كاڵبوونه‌وه‌ی ڕه‌نگی قژ و ئۆكساندن له ڕه‌گی قژ دروست ده‌كات و كرداری پیربوون خێرا و سپیبوونی قژ، كاتێك له كه‌شوهه‌وایه‌كی پیس ده‌ژین.
پێنجه‌م: جگه‌ره‌كێشان، دووكه‌ڵی جگه‌ره‌كه هۆكارێكه بۆ سپیبوونی قژ، چونكه به‌هه‌مانشێوه كاریگه‌ری له‌سه‌ر تاڵه‌كانی قژ دروست ده‌كات و ئۆكساندن له ڕه‌گی قژ په‌یدا ده‌بێ و سه‌ره‌نجام قژ به‌ره‌و سپیبوون ده‌ڕوات.