پێ دەچێ دواجار سیاسییە عێراقییەكان بە پڕۆژەی قاسم سلێمانی رازی بووبن بە مەبەستی رزگاربوون لە راپەڕینی جەماوەری دژ بە حكوومەت، بەگوێرەی زانیارییەكانیش بێت پڕۆژەكەی ئێران خۆی لە مانەوەی دەسەڵاتدارانی ئێستەی عێراق دەدات كە ئێران ساڵانێكی زۆرە پشتگیرییان دەكات.
ئەمڕۆ چوارشەم 13ی تشرینی دووەم، میدیا عێراقییەكان ئاماژەیان بە پلانی ستراتیجی ئێران لە عێراق كرد كە سەركردە سیاسییە دەسەڵاتدارەكان پێی رازی بوون. قاسم سلێمانی فەرماندەی سوپای قودس كە سەرپەرشتی دۆسیەی عێراق دەكات لە كۆماری ئیسلامی ئێران، توانیویەتی سەركردە سیاسییەكان رازی بكات بە مانەوەیان لە دەسەڵات كە ساڵانێكی زۆرە دەسەڵاتیان بەدەستە، شارەزایانیش دەڵێن، ئەو پلانە زۆر ئەستەمە خۆپێشاندەران پێی رازی بن كە داوای دوورخستنەوەی بژاردەی سیاسی دەسەڵاتدار دەكەن.
زانیارییەكان باس لەوە دەكەن كە ئێران داڕێژەری ستراتیجە نوێیەكەیە و ژمارەیەك كۆبوونەوەی لە نێوان هێزە سیاسییەكان و كەسایەتییە حكوومییەكان بە ئامادەبوونی قاسم سلێمانی ئەنجام داوە.
سەرگرتنی پلانەكە دەرفەت بە ئێران دەدات كە بیر لە پاراستنی هەژموونی خۆی لەسەر عێراق بكات
سەرچاوەیەكی ئاگادار لە كۆبوونەوەكان دەڵێ، قاسم سلێمانی پلانی چاكسازی داڕشتووە كە بەهۆیەوە عادل عەبدولمەهدی لە دەسەڵات دەمێنێتەوە تا ئەنجامدانی هەڵبژاردنی نوێ كە بڕیارە ساڵی داهاتوو ئەنجام بدرێت. دەڵێ، سەرگرتنی پلانەكە دەرفەت بە ئێران دەدات كە بیر لە پاراستنی هەژموونی خۆی لەسەر عێراق بكات.
خۆپێشاندانی 44 رۆژی رابردووی بەغدا و شارەكانی تر، بووەتە گەورەترین هەڕەشە لەسەر سیستمی سیاسی عێراقی كە شیعەكان هەژموونیان بەسەر هەیە، تا ئێستەش زیاتر لە 300 خۆپێشاندەر گیانیان لە دەست داوە و زیاتر لە 12 هەزاری تریش بریندارن.
بەرپرسێكی باڵای تەناهی بە "رۆیتەرز"ـی راگەیاندووە، تاكتیكی نوێ هەیە كە بڕیاری لەسەر دراوە وەك هەوڵێك كە خۆپێشاندانەكان لە گۆڕەپانی تەحریر گیر بكەن و گۆڕەپانەكانی تر لە دەستی خۆپێشاندەران دەربهێنن، دواتریش رێیەكانی چوون بەرەو تەحریر دابخەن كە ماوەی 44 رۆژە خۆپێشاندان لەو گۆڕەپانە بەردەوامی هەیە.
زیاتر گوتی "هێزە تەناهییەكان بڕیاریان پێ گەیشتووە كە بە ئارامی مامەڵە لەگەڵ خۆپێشاندەران بكەن و گەمارۆی گۆڕەپانی تەحریر بدەن، هاوكات دەسەڵاتیش دەیەوێت پلانی چاكسازی جێبەجێ بكات بۆ هێوركردنەوەی دۆخەكە تا ئەنجامدانی هەڵبژاردنی نوێ كە كۆمسیۆنێكی نوێ سەرپەرشتی بكات كە زیاتر لەوەی ئێستە هەیە سەربەخۆ تر بێت".
ئەو سەرچاوەیە ئەوەشی ئاشكرا كردووە كە پلانەكەی سلێمانی ئەوەیە ژمارەی ئەندامانی پەرلەمانیش كەم بكرێتەوە و نوێنەرایەتی زۆرینەی پێكهاتەكانی عێراقیش بكات، ئەم "ستراتیجە لەلایەن زۆرینەی هێزە شیعییەكانی لەلایەن ئێرانەوە پشتگیری دەكرێن، پێشوازی لێكراوە كە پشتگیری لە حكوومەتی ئێستە دەكات، تەنانەت موقتەدا سەدریش پشتگیریی لەو پلانە دەكات، تەنانەت سوننە و كوردیش پشتگیری لێ دەكەن".
ئەو هەوڵەی ئێران و سولێمانی لە كاتێكدایە كە خۆپێشاندەران داوای گۆڕینی سیستمی سیاسی و دەسەڵاتدارانی ئێستە دەكەن، بۆیە چاوەڕوان دەكرێت خرۆشی زیاتر لە خۆپێشاندانەكان بنێت.