وەزیری هەرێم بۆ كاروباری پێكهاتەكان رای دەگەیەنێت، بۆ گەیاندنی داوای پێكهاتەكانی هەرێمی كوردستان هەوڵی بەردەوام دەدەین و حكوومەتیش بە تەواوی پشتوانییان دەكات.
ئەمڕۆ پێنجشەم 14ی تشرینی دووەم، ئایدن مەعرووف وەزیری هەرێم بۆ كاروباری پێكهاتەكان بە "وشە"ی را گەیاند، كۆبوونەوەی سێیەممان لەگەڵ پێكهاتە و ئاینزاكانی هەرێمی كوردستان بوو بۆ گوێگرتن لە داخوازی و كێشە و گرفتەكانیان.
حكوومەتی هەرێم بە هەموو شێوەیەك پشتیوانی مافی پێكهاتە و ئاینزاكانی هەرێمی كوردستان دەكات
وەزیری هەرێم گوتی، داواكاری ئەوان زیاتر لەسەر رێزگرتن و پاراستنی مافی پێكهاتەكان بوو لە هەرێمی كوردستان، هەروەها پێكهاتەكان پشتوانی خۆیان بۆ حكوومەتی هەرێم دووپات كردەوە.
ئایدن مەعروف ئەوەی خستەڕوو، حكوومەتی هەرێم بە هەموو شێوەیەك پشتیوانی مافی پێكهاتە و ئاینزاكانی هەرێمی كوردستان دەكات، چونكە ئەوەی یەكێكە لە هێڵە گشتییەكانی كارنامەی حكوومەتی هەرێمی كوردستان.
هەرێمی كوردستان بەهۆی ئەوەی فرەپێكهاتە و ئاینە بووەتە شوێنێكی ئارام و پارێزراو بۆ ئەوان، هەروەها لە حكوومەتی هەرێم و پۆستە كارگێڕییەكان پۆستیان پێ دراوە.