لە دوای كۆنگرەكەیەوە، یەكێتیی نیشتمانیی كوردستان چووەتە سوڕی متبوونەوە و هێشتا نەیتوانیوە كۆنگرەكەی تەواو بكات و بچێتە دوای قۆناغی كۆنگرە. بەپێی زانیارییەكان، دوور نییە بەهۆی ناكۆكییەكانەوە یەكێتی نەتوانێ سەرۆك یەكلا بكاتەوە، ئەوەشی هەیە بە "بێدەنگیی لە چاوەڕوانیی تەقینەوەدا" پێناسە دەكرێت.
یەكێتیی نیشتمانیی كوردستان دوای چەندان ساڵ توانی كۆتایی ساڵی ڕابردوو كۆنگرەیەك ببەستێت، بەڵام كۆنگرە یەك كاری كرد و هەموو ئەركەكانی دا بە كۆڵی سەركردایەتیی نوێدا، ئەركی دروستكردنەوەی هەیكەلی یەكێتییان پێ هاتووەتە سپاردن. كۆنگرە پێڕەوی ناوخۆیشی دایە سەركردایەتی، هەڵبژاردنی سەرۆك و جێگرەكانی بەهەمانشێوە و دیاریكردنی ئەندامانی ئەنجوومەنی جێبەجێكردنیش هەروا.
ئەوە گومانی ئەوەی دروست كردووە كە یەكێتی كۆنگرەیەكی لەپێناو هەڵبژاردنی ئەو سەركردایەتییانە ئەنجام دابێت، ئەگەرنا ئەو كێشانەی پێشتر لەناو ئەو حزبەدا هەبوون، وەك خۆیان ماون بەو كێشانەیشەوە كە كۆنگرە بۆی زیاد كردووە.
یەحیا ئەحمەد مامۆستای زانكۆ و چاودێری سیاسی، ئاماژە بەوە دەكات كە كۆنگرەی یەكێتی تەنیا ڕووكەشەكەی كۆنگرە بوو. دووپاتی كردەوە، "بەدەر لەوە تا ئێستەیش سەركردایەتیی یەكێتی هەر لە كۆنگرەدایە، ئەوەی ناوی كرانەوەی كۆبوونەوەی ئەنجوومەنی گشتیی سەركردایەتییان لێ ناوە، هیچ نییە جگە لە مانەوە لە هۆڵی كۆنگرە و متبوون و سڕ بوون لە بەردەم ناكۆكیی باڵەكان و نەبوونی چارەسەردا".
ئەو چاودێرە سیاسییە بۆ "وشە" گوتی، "كۆنگرەیەك پێڕەو پەسەند نەكات، ستراتیجی كاری داهاتووی حزب و سەرۆك و دەسەڵاتی پۆستەكانی یەكلا نەكاتەوە، چۆن ناوی كۆنگرەی لێ دەنرێت؟".
"ئەم دۆخی سڕبوونەی یەكێتی، بەڵگەی ملنەدانی باڵەكانی ناویەتی و دووریش نییە یەكێتی بەهیچ شێوەیەك نەتوانێ سەرۆك یەكلا بكاتەوە و دایبنێت". ئەحمەد وای گوت.
یەكەم كۆبوونەوەی سەركردایەتیی یەكێتی كە دوای زیاتر لە 20 ڕۆژ لە كۆنگرە ئەنجام درا، پێشێلی پێڕەوەكەیانی كرد كە دەبوو لە ماوەی سێ تا ١٥ ڕۆژدا یەكەم دانیشتن بكەن. وەك ئەوەی كۆنگرە هیچ كارێكی نەكردبێت، تێیدا سەرلەنوێ لیژنەیان بۆ هەمواری پێڕەوی ناوخۆ و دانانی دەسەڵاتی پۆستەكان داناوە.
بەپێی زانیارییەكانی "وشە" كە لەناو یەكێتییەوە دەستی كەوتووە، تا ئێستە ڕێككەوتن لەسەر سەرۆك، جێگرەكانی و دەسەڵاتەكانیان نەكراوە، پێ دەچێت ڕێككەوتن لەسەر ئەو پرسانە كاتێكی درێژتری بوێت.
هونەر تۆفیق چاودێری سیاسیی، ئەوە دەخاتە ڕوو كە ئەم كۆنگرەیەی یەكێتیی نیشتمانیی كوردستان، هەروا بە كراوەیی بمێنێتەوە بۆ كاتێكی نادیار و درێژە بكێشێت بۆ چەند مانگێك یان ساڵێكی تر.
ئەو بۆ "وشە" روونی كردەوە، "كاتێك كۆنگرە بە كۆتا دەگەیشت كە دیدی سیاسیی حزبەكە (ڕێباز و پێڕەو) تەواو بكرانایە، سەرۆك یان سكرتێر هەر لە كۆنگرەدا دەستنیشان بكرایە، ستراتیجی سیاسیی حزبەكە لە پێوەندی بە ناوخۆ و بەغدا و ناوچەكەوە دیاری بكرایە، ڕاپۆرتی كۆتایی كۆنگرە بخوێنرایەتەوە و ئەرك و بەرپرسیارێتی ئەنجوومەن و دەستەكانی سەركردایەتیی سیاسی دابەش بكرانایە، پێداچوونەوە بە هەیكەلی دارایی و میدیایی حزبەكەدا بكرایەتەوە."
"كراوەیی كۆنگرەكە دەبێتە هۆی كردنەوەی ڕووبەرێكی تر بۆ كوتلەكان. هاوكێشەی هاوپەیمانێتیی كوتلەكان دەگۆڕێن لەناو ئەنجوومەنی سەركردایەتیدا. ئەو كراوەییە یەكێتی دەكاتە حزبێكی كراوەتری بێ دەرگە و پەنجەرە كە دزەكردن و نوغرۆكردنی زۆر ئاسانتر بێت لەوەی ئێستە هەیە، ئەوكاتە كۆكردنەوەی دەبێتە مەحاڵ". ئەو چاودێرە سیاسییە وای گوت.
كۆنگرە كێشەی زۆری بۆ یەكێتی زیندوو كردەوە
پێش كۆنگرە بەشێك لە بەرپرسانی یەكێتی بەردەوام دەیانگوت كۆنگرە هەموو كێشەكان چارەسەر ناكات. ڕاستییەكەی كۆنگرە كێشەی زۆری بۆ یەكێتی زیندوو كردەوە و حزبەكەی خستووەتە سوڕی متبوونەوە.
دابان حەمەد كاكە ئەندامی ئەنجوومەنی گشتیی سەركردایەتیی یەكێتی، ئەو زانیارییانەی ڕەت كردەوە و ئاماژەی بەوە دا، یەكێتی دەیەوێ پرۆسەكان بە سروشتی خۆیان بەڕێوە بچن و هیچ كێشەیەك لە هیچ بڕیار و یەكلاكردنەوەی پۆستێكدا دروست نەبێت.
بەگوتەی حەمەد، "نەیارانی یەكێتی تەنیا ئەو جۆرە قسانە دەزانن كە لەسەری بیكەن، بەڵام یەكێتی بە كۆنگرەكەی وەڵامی هەمووانی دایەوە و پتەوی و یەكڕیزی و بەهێزی و نوێبوونەوەی لە ئایندەیەكی نزیكدا، هێندەی تر ئەو كەسانە تووشی سەرسوڕمان دەكات."