یه‌كه‌م كۆبوونه‌وه‌ی‌ ئه‌نجوومه‌نی‌ باڵای‌ ئابووریی هه‌رێمی‌ كوردستان به‌ڕێوه‌ چوو

:: PM:06:37:27/01/2020 ‌
مه‌سروور بارزانی سه‌رۆكی حكوومه‌تی هه‌رێمی كوردستان، سه‌رپه‌رشتیی یه‌كه‌مین كۆبوونه‌وه‌ی ئه‌نجوومه‌نی باڵای ئابووریی هه‌رێمی كوردستان كرد.

سه‌رۆكی حكوومه‌ت دووپاتی‌ له‌ گرنگی داڕشتنی سیاسه‌ت و نه‌خشه‌ڕێگه‌یه‌كی زانستی كرده‌وه‌
به‌گوێره‌ی‌ ڕاگه‌یه‌نراوێكی‌ حكوومه‌تی‌ هه‌رێمی‌ كوردستان، له‌ كۆبوونه‌وه‌ی‌ ئه‌مڕۆی‌ ئه‌نجوومه‌نی‌ باڵای‌ ئابووری‌، دۆخی ئێسته‌ی هه‌رێمی كوردستان و میكانیزمی پێویست بۆ گه‌شه‌پێدانی ئابووری تاوتوێ كرا.

وه‌ك له‌ ڕاگه‌یه‌نراوه‌كه‌دا هاتووه‌، سه‌رۆكی حكوومه‌ت دووپاتی‌ له‌ گرنگی داڕشتنی سیاسه‌ت و نه‌خشه‌ڕێگه‌یه‌كی زانستی كرده‌وه‌ بۆ گه‌شه‌پێدانی ئابووری له‌ رێگه‌ی زیادكردنی داهات به‌ ئاراسته‌ی رێكخستنه‌وه‌ی داهاته‌كان و رێگه‌گرتن له‌ خۆدزینه‌وه‌ له‌ باج و كه‌مكردنه‌وه‌ی خه‌رجییه‌ ناپێویسته‌كان.

ڕوونیش كراوه‌ته‌وه‌، سه‌رۆكی حكوومه‌ت ئاماژه‌ی به‌ كارنامه‌ی كابینه‌ی نۆیه‌م كرد، كه‌ ئامانجێكی له‌ پێشینه‌ی هه‌مه‌جۆركردنی سه‌رچاوه‌كانی داهات و هاندان و پێشكه‌شكردنی ئاسانكاری پێویسته ‌بۆ وه‌به‌رهێنه‌ره‌ ناوخۆیی و بیانییه‌كان و ، ره‌خساندنی زه‌مینه‌یه‌كی له‌بارتره‌ بۆ وه‌به‌رهێنان له‌ گشت كه‌رته‌كاندا و گرنگیدان ‌به‌ كه‌رتی كشتوكاڵ و دۆزینه‌وه‌ی بازاڕ بۆ به‌رووبووم و به‌رهه‌می ناوخۆیی.



وشە - سه‌رخێڵ هاشم

ئه‌م بابه‌ته 231 جار خوێنراوه‌ته‌وه‌‌