پێشبینی دەكرێت ئەمڕۆ فەرمانی خەرجكردنی پارەكەی بەغدا بگاتە هەولێر و بۆ ئەوەش لیستی مووچەی سەرجەم وەزارەتەكان ئاشكرا دەكرێت و ئەمڕۆ مووچەی وەزارەتێك دابەش دەكرێت.
ئەمڕۆ یەكشەم 23ـی شوبات، بەپێی خشتەی دابەشكردنی مووچە، ئەمڕۆ یەكشەم مووچەی وەزارەتی سامانە سروشتییەكان دابەش دەكرێت .
لە زانیارییەكاندا هاتووە، پارەكەی بەغدا گەیشتووەتە هەولێر و هیچ كێشەیەكی نییە، تەنیا فەرمانی خەرجكردنی بۆ وەزارەتی دارایی ماوە، چاوەڕوان دەكرێ لەم هەفتەیە ئەو فەرمانە دەربچێت و دابەشكردنی مووچە خێرا بكرێت.
لە ناوەڕاستی هەر مانگێك عێراق بڕی 452 ملیار دینار بۆ هەرێمی كوردستان دەنێرێت
هەرێمی كوردستان بۆ دابەشكردنی مووچەی فەرمانبەران، دوای تەنگژەی دارایی پشت بە فرۆشتنی نەوت و ئەو بڕە پارەیەی لە بەغداوە بەپێی ڕێككەوتنێك بۆ هەرێمی كوردستان دێتە ناردن، دەبەستێت.
بەپێی ڕێككەوتنی نێوان هەرێمی كوردستان و عێراق، لە ناوەڕاستی هەر مانگێك عێراق بڕی 452 ملیار دینار بۆ هەرێمی كوردستان دەنێرێت و بە داهاتی ناوخۆیی و پارەی هاوپەیمانان بۆ پێشمەرگە و فرۆشتنی نەوت مووچەی فەرمانبەران دەدرێت.
لە سەرەتای ئەمساڵ پاشەكەوتی مووچە لەسەر فەرمانبەرانی هەرێمی كوردستان هەڵگیرا و پێدانی مووچە ئاسایی بووەتەوە. لە پێنجی سەرەتای هەر مانگێك لە هەرێمی كوردستان مووچە دابەش دەكرێت.