كۆرۆنا زیانی به‌ 70%ی دامه‌زراوه‌ ئابووری و پیشه‌سازییه‌كانی سنه‌ گه‌یاندووه‌

:: AM:10:31:23/05/2020 ‌

هیچ وڵاتێك و ناوچه‌یه‌ك به‌ده‌ر نییه‌ له‌ زیانه‌كانی كۆرۆنا و كاریگه‌ریی له‌سه‌ر سه‌رجه‌م كه‌رته‌ بازرگانی و پیشه‌سازییه‌كان هه‌بووه‌ و پارچه‌كانی كوردستانیش له‌م زیانانه‌ پشكی خۆیان به‌ركه‌وتووه‌.

به‌پێی ئامارێكی ژووری بازرگانی سنه‌، كۆرۆنا به‌ رێژه‌ی 70% زیانی به‌ دامه‌زراوه‌ ئابووری و بازرگانییه‌كان گه‌یاندووه‌.

كه‌مال حوسێنی سه‌رۆكی ژووره‌كه‌ باسی له‌وه‌ كردووه‌، بۆ ده‌ستخستنی ئه‌و ئاماره‌ پشتیان به‌ 139 كۆمپانیا و كارگه‌ و بازرگان به‌ستووه‌.

وه‌ك زیاتر خستیه‌ڕوو، زیانه‌كانی كۆرۆنا وایكردووه‌ 72.7%ی ناوه‌ند و دامه‌زراوه‌ ئابووری، بازرگانی، گه‌شتوگوزار، پیشه‌سازی، بازرگانی و كشتوكاڵ له‌ ئاستێكی به‌رزدا زیانیان به‌ركه‌وێت.
شه‌ش ملیۆن و 400 هه‌زار كه‌س له‌ ئێران پیشه‌ و كاریان له‌ده‌ست ده‌ده‌ن.

به‌گوێره‌ی رادیۆ فه‌ردا، پێشتر ناوه‌ندی توێژینه‌وه‌ی په‌رله‌مانی ئێران ئه‌وه‌ی خستبووه‌ڕوو كه‌ شه‌ش ملیۆن و 400 هه‌زار كه‌س له‌ ئێران به‌ هۆی كاریگه‌رییه‌كانی كۆرۆنا پیشه‌ و كاریان له‌ده‌ست ده‌ده‌ن.

ئه‌نجامه‌كانی راپرسییه‌كیش ئه‌وه‌ی ده‌رخستووه‌ كه‌ كۆرۆنا كاریگه‌ری خراپی له‌سه‌ر باری دارایی 50%ی خه‌ڵكی ئێران داناوه‌.

ئێران به‌ گشتی و پارێزگاكانی رۆژهه‌ڵاتی كوردستان به‌ تایبه‌تی له‌كاتێكدا ده‌كه‌ونه‌ ژێر كاریگه‌ریی ئه‌و زیانانه‌ كه‌ پێشتر به‌ هۆی سزاكانی ئه‌مه‌ریكا زیانیان به‌ركه‌وتووه‌، دۆخی ئابووریی ئه‌و وڵاته‌ زۆر خراپ بووه‌ و رێژه‌ی هه‌ژاریی و بێكاری به‌ خێرایی به‌رز بووه‌ته‌وه‌.



وشە - سلێمان تاشان

ئه‌م بابه‌ته 108 جار خوێنراوه‌ته‌وه‌‌