ئێوارەی ڕۆژى پێنجشەم 16ى كانوونى دووه‌م، دوای پەسەندکردنی پڕۆژە یاسای چاکسازی لە پەرلەمانی کوردستان، بزوتنەوەی گۆڕان لە ڕاگەیەندراوێکدا به‌فه‌رمى هەڵوێستی خۆی لەبارەی یاسای چاکسازییەوە ئاشکرا کرد.
پێمان وایە چاکسازی.. پێویستیيەکی لەپێشینەی ئەزمونی حوکمڕانی هەرێمی کوردستانە
لە ڕاگەیاندراوەكەی بزوتنەوەی گۆڕاندا هاتووە، "لە فەرهەنگی سیاسیی بزوتنەوەی گۆڕاندا، پەیڕەوکردنی چاکسازییەکی گشتگیر لە هەرێمی کوردستان، ئەولەویەتی سیاسی و ئامانجی ژمارە یەکی خەباتی سیاسیی بووە، وەپێشمان وایە چاکسازی، پێویستیيەکی لەپێشینەی ئەزمونی حوکمڕانی هەرێمی کوردستانە."
ڕوونكراوه‌ته‌وه، "لەو چوارچێوەیەدا، بە درێژایی خەباتی سیاسیی گۆڕان لە پەرلەمان و دامەزراوە هەڵبژێردراوەکان، لە قۆناغی ئۆپۆزسیۆنی و لە کاتی بەشداریکردن لە حکوومەتدا، لەسەر شەقام و لەناو خەڵک، لەڕێی فشاری میدیایی و ڕێکخراوەکانی کۆمەڵگای مەدەنی، هەوڵی ڕژد دراوە بۆ دەستپێکردن و پەلەکردن لە پەیڕەوکردنی چاکسازی ڕاستەقینە لە ڕووی سیاسی و ئیداری و ئابوری ویاسایى".
ڕاى گه‌یاندووه، "لای هەموان ئاشکرایە، بزوتنەوەی گۆڕان خەباتی مەدەنی هەڵبژاردووە بۆ ئەوەی ڕێبازێکی نوێ لەناو ژیانی سیاسیی کورددا بێنێتە کایەوە، خەباتی کردووە بۆ هەبوونی ئیدارەیەکی نموونەیی کە هاووڵاتییانی کوردستان هەست بکەن لە هەرێمەکەی خۆیان ڕێزلێگیراو و حساب بۆ کراون. خەباتی کردووە بۆ بەگژداچوونەوەی گەندەڵی و بوونی شەفافیەت و ڕوونی لە کاروباری گشتیدا."
بزوتنەوەی گۆڕان لە ڕاگەیاندراوەكەیدا ئاماژه‌ى كردووه، "لەم قۆناغە سیاسیەشدا، بەرپرسیارێتی نیشتمانی لە هەرێمی کوردستان وادەخوازێت، مەترسیەکانی ڕۆژهەڵاتی ناوەڕاست و نائارامی دەوڵەتانی دراوسێ و ناسەقامگیری عێراق بخوێندرێتەوە و پرسی چاکسازی بکرێتە پێشمەرجی کارەکانی پەرلەمان و حکوومەتی هەرێم و دەسەڵاتی دادوەری و پارتە سیاسیەکانی هەرێم."
لە ڕاگەیاندراوەكەی بزوتنەوەی گۆڕاندا هاتووە، "بەشداریکردنی گۆڕان لە کابینەی نۆیەمی حکوومەت، لەسەر بنەمای ڕێککەوتن بووە بۆ سەرپێخستنی پڕۆسەی چاکسازی، بەتایبەت پابەندبوونی حکوومەتی هەرێم بە پەیڕەوکردنی پڕەنسیپەکانی حووکمڕانی باش، شەفافیەت و لێپرسینەوە و هاوبەشی ڕاستەقینە، هاوکاتیش ڕەخساندنی دەرفەتی یەکسان بۆ هەمووان و بە دامەزراوەیی و نیشتمانیکردنی دامودەزگاکانی هەرێم و ڕێگری لە قۆرخکاری و بەتاڵانبردنی داهاتی ووڵات."
هه‌روه‌ها ڕاى گه‌یاندووه، "لە فەرهەنگی سیاسی بزوتنەوەی گۆڕاندا، پەیڕەوکردنی چاکسازییەکی گشتگیر لە هەرێمی کوردستان، ئەولەویەتی سیاسی و ئامانجی ژمارەیەکی خەباتی سیاسی بووە، وەپێشمان وایە چاکسازی، پێویستیەکی لەپێشینەی ئەزموونی حوکمڕانی هەرێمی کوردستانە."
ئاشكراى كردووه، "لەم سۆنگەیەوە، بزوتنەوەی گۆڕان چاکسازی بە پڕۆسەیەکی بەردەوام دەزانێت کە پێویست دەکات هەنگاوەکان کرداری و قۆناغ بە قۆناغ تەواوکاری یەکتر بن، هەربۆیە، هەرێمی کوردستان، لە نێوان دوو بژاردەدا نییە، بەڵکو لە نێوان بژاردەکانی پەیڕەوکردنی چاکسازی ڕاستەقینە و جێبەجێکردنی چاکسازی گشتگیردایە و جگە لەوەش هیچ ڕێیەکی تر نییە بەتایبەت گەر بەرپرسانە بنواڕینە ئایندەی میللەت و نیشتمانەکەمان."
"پەیوەست بە پڕۆژە یاسای (چاکسازی لە خانەنشینی و مووچە و دەرماڵە و بەخشین و ئیمتیازاتەکانی تر) بە سەرەتایەکی باشی پرۆسەی چاکسازی دەبینین، بەڵام نابێ پڕۆسەی چاکسازی بەهیچ شێوەیەک تەنها لەوەدا کورتبکرێتەوە، بەڵکو پێویستە هەنگاوی خێرا بنرێت بۆ چاکسازی لە سەرجەم سێکتەر و بوارەکانی تریشدا لە سەرووی هەموویانەوە خاڵە سنوورییەکان و دۆسیەی نەوت و وەبەرهێنان."، له ڕاگه‌یاندراوه‌كه‌ى بزووتنه‌وه‌ى گۆڕان وا هاتووه.
لە ڕاگەیەندراوەکەدا بڵاویانكردووه‌ته‌وه، "هاوکات ئێمە بەرگری لە دەستەبەرکردنی عەدالەت لەنێوان مووچەی پلە باڵاکان و فەرمانبەرانی ئاساییدا دەکەین. دەمانەوێ مووچەی پلەکانی خوارەوە هەڵکشێ بۆ ئاستی دابینکردنی لایەنی کەمی پێویستیەکانی ژیانی خێزان لە هەرێمی کوردستاندا. هەرچۆن گرنگە بڕیاری دروست و دادپەروەرانە لەسەر مووچە و خانەنشینی پلە باڵاکان بدرێت، لەهەمانکاتیشدا و بەهەمان گرنگیەوە داوادەکەین کە ئاوڕی ڕاستەقینەش لە مووچە و خانەنشینی پلە نزمەکان بدرێتەوە و ژیانێکی شایستەیان بۆ دابین بکرێت."