دوای ئەوەی ئەمڕۆ لە هەندێك لە میدیاكان هاتە بڵاوكردنەوە كە ئۆكراینا بە پلانی ئاشتیی ئەمەریكا بۆ ئاگربەست رازی بووە، ئەمشەو دۆناڵد ترەمپ سەرۆكی ئەمەریكا رای گەیاند كە ئێستە دنیا زۆر لە راگەیاندنی رێككەوتنێكی ئاگربەستی شەڕی ئۆكراینا و رووسیا نزیكە.
ترەمپ لە لێدوانێك لە كۆشكی سپی گوتی، بابەتەكە ئاسان نییە، بەڵام پێم وایە كە زۆر لە گەیشتن بە رێككەوتن نزیكین و با بزانین چی دەبێت، وەك ئاژانسی "تاس"، باسی كرد، ئەوە لەوكاتەی هەر ئەمڕۆ ڤۆلۆدیمێر زیلینسكی سەرۆكی ئۆكراینا دووپاتی كردەوە كە كیێڤ ئامادەیە بۆ گەیشتن بە رێككەوتنێكی ئاشتی كە ئەمەریكا پاڵپشتی دەكات، ئەو ئامادەیە بۆ گفتوگۆكردن لەبارەی خاڵە هەستیارەكان لەگەڵ هاوتا ئەمەریكییەكەی، كە دەبێت وڵاتانی ئەوروپاش تیادا بەشداری بكەن.
ئەمڕۆ سێشەم بەرپرسێكی ئەمەریكی بە تۆڕی "ئەی بی سی نیوز"ی ئەمەریكی راگەیاند، ئۆكراینییەكان بە رەشنووسی پلانی هەمواركراوی ئاشتی رازی بوونە و ئێستەش چەند وردەكارییەكی بچووك ماوە و پێویستە ئەوانیش چارەسەر بكرێن.
سەبارەت بە هەڵوێستی رووسیا بەرانبەر بە پلانەكەی ئەمەریكا، سێرگی لاڤرۆڤ وەزیری دەرەوەی ئەو وڵاتە رای گەیاند كە وڵاتەكەی دەقە هەمواركراوەكەی پلانەكەی بەدەست نەگەیشتووە و ئەگەر رەچاوی ناوەڕۆكی گفتوگۆكانی ئالاسكا كە لە ئابی رابردوو لە نێوان رووسیا و ئەمەریكا ساز كرا نەگونجێت، رەنگە رەتی بكەینەوە.
ئەمە و بڕیارە لە چەند رۆژی داهاتوو زیلینسكی سەردانی ئەمەریكا بكات بۆ دیاریكردنی دوایین رەشنووسی پلانەكەی ئەمەریكا بۆ وەستانی شەڕی ئۆكراینا كە لە 19 بڕگە پێك هاتووە لەوانە وازهێنانی ئۆكراینا لە بیرۆكەی چوونە ناو ناتۆ و كەمكردنەوەی ژمارەی سوپاكەی و بڵاونەكردنەوەی هیچ هێزێكی بیانی لەسەر خاكەكەی و ئەنجامدانی هەڵبژاردن لە ماوەی 100 رۆژ لە وەستانی شەڕ لە ئۆكراینا.