لەدوای شكتسهێنانیان لە ئاسیا و رۆژهەڵاتی ناوەڕاست، ئێستە زۆرینەی بزاوە توندڕۆ ئیسلامییەكان، لەوانە داعش و قاعیدە روویان لە كیشوەری ئەفریقیا كردووە و بەسوودبینین لە دۆخی لەرزۆكی ئابووری و تەناهی و سەربازیی ئەو وڵاتانە و ململانێی زلهێزەكان لەوێ، خەریكە دەبنە هەڕەشەی رژد بۆ سەر چەند وڵاتێك و ترس و تۆقاندن لەناو خەڵك بڵاو دەكەنەوە.
لە سایەی ململانێی سەختی رووسیا و ئەمەریكا و رۆژئاوا لە ئەفریقیا، ئێستە بۆركینا فاسۆ لە ساتێكی سەخت و نزیك لە رووخانێكێكی بێوێنەی تەناهیدا دەژیت، خەریكە حكوومەت و سوپای ئەو وڵاتە رووبەرێكی فرەوانی خاكی وڵاتەكە بۆ گرووپی "نەسرەوتولئیسلام و موسلمین"، سەر بە رێكخراوی قاعیدە لەدەست دەدەن و كە بە هەنگاوی جێگیر بەرەو گەمارۆدانی واغادۆغۆی پایەتەخت دەچن و خەریكە لە وڵاتەی دادەبڕێنن، ئەوە لەوكاتەی رووسیا باسی گەشەی ئابووری لەو وڵاتە دەكات.
بەپێی خەمڵاندنە تەناهییەكان، گرووپی "نەسرەتولئیسلام و موسلمین"ی پێوەندیدار بە رێكخراوی قاعیدە، هەروەها رێكخراوی داعش لە ویلایەتی كەناراوەكان، بەیەكەوە كۆنترۆڵی 60%ی وڵاتەكە دەكەن، ئەو دۆخەش لە دوای كودەتای 2022 هاتە كایەوە، كە نەقیب ئیبراهیم تراوری گەیاندە دەسەڵات و هێزەكانی فڕەنسا لەو وڵاتە كشانەوە و گرووپی بەكرێگیراوی ڤاگنەر شوێنی ئەوانی گرتەوە كە لە رووسیاوە نزیكن.
جیا لە بۆركینا فاسۆ، گرووپی "ئەنسارولئیسلام و موسلمین" توانوویانە لە وڵاتی مالیش بە هەمان شێوە گەیشتنی سووتەمەنی بۆ چەندان ناوچە بوەستێنن و هەوڵی گەیشتن بە پایەتەختی ئەو وڵاتەش دەدەن، ویل براون شرۆڤەكار دەڵێت، دۆخەكە بەرەو گەمارۆدانێكی بە هەنگاوی پایەتەخت دەچێت، هێزەكانی حكوومەت لە هەڵوێستی بەرگریدان و ورەی سوپا نزمە، لەوكاتەی گرووپە توندڕۆكان چەكێكی زۆریان لە جبەخانەكانی دەوڵەت دەست كەوتووە، بۆیە لەو دۆخەی هەیە دیارە وڵاتەكە بەرەو سیناریۆی مەترسیدار هەنگاو دەنێت، نەك بەهۆی كۆنترۆڵكردنی راستەوخۆی گرووپە توندڕۆكان بۆ پایەتەخت، بەڵكو بەهۆی خنكاندنی، لەوكاتەی حكوومەت خەریكە بوونی سیاسی و سەربازی لەدەست دەدات و سوپاش شەكەتە و ورەی روو لە دابەزینە.