ئێستە چەكی حزبوڵا بووەتە گرێ كوێرە لەبەردەم لبنان بۆ بوونەوە بە دەوڵەتێكی ئاسایی لە ناوچەكە، لە دوای ئەو گورزە گەورەی ئیسرائیل لە تەواوی حزبەكەی دا و تووشی شكسێكی گەورەی كرد و ئەو هەڕەشانەی حزبەكە لە ئیسرائیلی دەكرد بەوەی هەزاران مووشەك ئاراستەی ئیسرائیل دەكات، دەركەوت تەنیا قسە بووە، سەرۆك وەزیرانی لبنان دووپاتی كردەوە كە چەكی حزبوڵا نەیتوانیوە لبنان و سەركردەكانی حزبەكە بپارێزێت.
ئێستە جیا لە گوشارەكانی ئەمەریكا لەسەر لبنان بۆ داماڵینی چەكی حزبوڵا پێش كۆتایی ئەمساڵ، ئیسرائیل لبنانی لە نێوان دوو بژارە سەرپشك كردووە، داماڵینی چەكی حزبوڵا یان شەڕ و هێرشی سەربازیی ئیسرائیل بۆ داماڵینی چەكی ئەو حزبە بە زەبری هێز، كە رەنگە ئەوەش لبنان بە دەردی غەزە ببات و دیان ساڵی تر بیباتە دواوە.
ئەمڕۆ پێنجشەم
نەواف سەلام سەرۆك وەزیرانی لبنان وەك شەرمەزاركردنی حزبوڵا بەهۆی دەستگرتنی بە چەكەكەی و شلۆقیی دۆخەكەی و بێكەڵكیی چەكەی دەستی كە خەریكە لبنان بەرەو وێرانبوون دەبات، هاوكات بۆ پاراستنی لبنان لە شەڕ، دووپاتی كردەوە كە چەكی حزبوڵا نەیتوانیوە بەرپەرچی ئیسرائیل بداتەوە و پارێزگاری لە لبنان و سەركردەكانی حزبەكەش بكات.
روونی كردەوە، بۆیە ئەو چەكە نە دەتوانێت بەرپەرچ بداتەوە و نە دەشپارێزێت و نە پاڵپشتی غەزەش دەكات، لبنانییەكان و سەركردەكانی ئەو حزبەی نەپاراستووە و ناشیان پارێزێت، چەكی حزبوڵا رێگری لە هێرشەكان نەكردووە، بۆیە لە داماڵینی ئەو چەكانە و سەپاندنی دەسەڵاتی دەوڵەت دواكەوتووین، پێویستە رێگری لە گواستنەوە و بەكارهێنانی ئەو چەكانە لە باكوری رووباری لیتانی بكرێت، پێویستە یەكەم قۆناغی داماڵینی چەك بەر لە كۆتایی ئەمساڵ تەواو بكرێت.