ئێستە ئەمەریكا بە دوای وەستانی شەڕی ئۆكراینایە و پلانێكی بۆ ئەو مەبەستە بۆ هەردوولای شەڕكەر رەوانە كردووە بۆ ئەوەی تاوتوێی بكەن و ببێتە بنەمایەك بۆ گفتوگۆی هەردوولا و گەیشتن بە رێككەوتنێكی ئاگربەست بۆ وەستانی شەڕی ئۆكراینا بە هاوشێوەی شەڕی غەزە، لەوكاتەی سوپای رووسیا لە پێشڕەوییەكانی بەردەوامە، سەرۆكی رووسیاش ئاماژە دەكات، هێزەكانی ئۆكراینا لە دۆنباس پاشەكشە بكەن شەڕ دەوەستێت.
ئەمڕۆ پێنجشەم
ڤلادیمێر پوتین سەرۆكی رووسیا لە كۆنگرەیەكی رۆژنامەوانی گوتی، هەر لەگەڵ كشانەوەی هێزەكانی ئۆكراینا لە ناوچەی دۆنباس شەڕ دەوەستێت، ئاماژەی كرد كە ئێستە هێزەكانی رووسیا لە هەموو بەرەكانی شەڕ بەخێرایی لەپێشڕەویدان و مانگانە رووبەری ئەو خاكەی كۆنترۆڵی دەكەن زیاتر دەبێت.
پوتین روونی كردەوە، رووسیا چاوی بە رەشنووسی پلانەكەی ئەمەریكا بۆ ئاگربەست لە ئۆكراینا كەوتووە و پێمان وایە دەكرێ ئەو پلانە ببێتە بنەمایەك بۆ رێككەوتنەكانی داهاتوو بۆ ئاشتی لە ئۆركراینا، پێویستە هەموو بڕگەكانی پلانەكە تاوتوێ بكەین، لەبارەی ئەو هەواڵانەی باسی نیازی رووسیا دەكەن بۆ هێرشكردنە سەر ئەوروپا گوتی، ئەوانە درۆ و هەڵبەستنن و رووسیا ئامادەیە بۆ گفتوگۆكردن لەبارەی ئاسایشی ئەوروپا و سەقامگیری ستراتیجی لەگەڵ رۆژئاوا.
سەرۆكی رووسیا دووپاتی لەوەش كردەوە كە پێشبینی دەكرێت هەفتەی داهاتوو شاندێكی ئەمەریكا سەردانی مۆسكۆ بكات و پێویستە پێشنیازەكەی ئەمەریكا زمانێكی دپلۆماسییانە وەربگرێت.
شایەنی باسە لە چەند رۆژی رابردوو بەرپرسێكی ئەمەریكی رای گەیاند كە شاندی ئۆكراینا بە رەشنووسی پلانەكەی ئەمەریكا بۆ ئاشتی لە ئۆكراینا رازی بووە و هەندێك وردەكاری ماون بۆ باسكردن، هاوكات بڕیارە لە چەند رۆچی داهاتوو ڤلۆدیمێر زیلینسكی سەرۆكی ئۆكراینا بۆ ئەو بابەتە سەردانی كۆشكی سپی بكات.