رۆژنامه‌ى واشنتن پۆستى ئه‌مه‌ریكى پێشبینى كردووه، نیكۆلاس مادۆرۆ سه‌رۆكى ڤه‌نزویلا ئه‌گه‌ر خۆى له‌به‌رده‌م گوشاره‌كانى ئه‌مه‌ریكا رانه‌گرێت ئه‌وا وڵاته‌كه‌ى جێده‌هێڵێت و په‌نا ده‌باته به‌ر توركیا.
ئه‌مڕۆ هه‌ینى 28ى تشرینى دووه‌م، رۆژنامه‌ى
واشنتن پۆست باسى له‌وه كردووه كۆمه‌ڵێك ئاماژه هه‌ن كه وا ده‌كات پێشبینى بكرێت نیكۆلاس مادۆرۆ زیاتر خۆى له به‌رانبه‌ر ئه‌و گوشاره سیاسى و سه‌ربازییانه‌ى ئه‌مه‌ریكا رانه‌گرێت، چونكه دۆناڵد تره‌مپ سه‌رۆكى ئه‌مه‌ریكا بڕیارى داوه به "ئاسانى یان زه‌حمه‌تیش بێت" ئه‌وا له‌سه‌ر ده‌سه‌ڵات لاى بدات.
رۆژنامه ئه‌مه‌ریكییه‌كه باسى له‌وه كردووه‌ته‌وه، له‌وانه‌یه مادۆرۆ كاره‌كاسى پایته‌خت جێبهێڵێت و به‌ره‌و توركیا بڕوات، چونكه پێوه‌ندییه‌كى باشى له‌گه‌ڵ ره‌جه‌ب ته‌یب ئه‌ردۆغانى سه‌رۆكى توركیا هه‌یه و هه‌روه‌ها ئه‌ردۆغانیش پێوه‌ندییه‌كى باشى له‌گه‌ڵ سه‌رۆكى ئه‌مه‌ریكا هه‌یه.
سه‌رچاوه به‌رپرسه‌كان له ئه‌مه‌ریكا باسیان له‌وه كردووه، له‌وانه‌یه توركیا په‌ناگه‌یه‌كى ئارام بێت بۆ مادۆرۆ، به تایبه‌ت كه ده‌زانرێت متمانه‌ى به ئه‌ردۆغان هه‌یه.