عەبدوڵا ئۆجەلان لە پەیامێكی نوێدا لەبارەی پرسی كورد لە سووریا داوا دەكات هێزەكانی سووریای دیموكرات ببنە بەشێك لە سوپای فەرمیی سووریا، بە مەرجی مانەوەی هێزی تەناهیی تایبەت بە خۆیان، هاوكات ئەردۆغانیش رای گەیاند، ئاكپارتی لەم 23 ساڵەدا زۆر هەڵەی مێژووی وڵاتەكەی رایت كردەوە.
گوڵستان كڵچ ئەندامی كۆمیسیۆنی ئاشتی لە پەرلەمانی توركیا و پەرلەمانتاری دەم پارتی، وردەكاریی دیدارەكەی شاندی كۆمیسیۆنەكەی لەگەڵ عەبدوڵا ئۆجەلان بۆ میدیاكان ئاشكرا كرد.
بەگوێرەی زانیارییەكان، تەوەرێكی سەرەكیی دیدارەكە تایبەت بووە بە كاریگەریی دۆخی سووریا لەسەر پرۆسەی ئاشتی. ئۆجەلان پێشنیازی كردووە، دەبێت ڕێككەوتنی 10ی ئادار جێبەجێ بكرێت و لەو چوارچێوەیەدا هێزەكانی هەسەدە بچنە نێو پێكهاتەی سوپای سووریاوە، بەڵام بەو مەرجەی كورد هێزی ئاسایشی ناوخۆیی تایبەت بە خۆی هەبێت بۆ پاراستنی ناوچەكانی.
ڕێبەری زیندانیكراوی پەكەكە هەڵوێست و گوتارەكانی ئەم دواییەی ڕەجەب تەیب ئەردۆغان و دەوڵەت باخچەلی لەبارەی پرۆسەی ئاشتی بەرز نرخاندووە، لە هەمان كاتدا هۆشداریی داوە كە چەند زلهێزێكی نێودەوڵەتی بوونیان هەیە و نایانەوێت هاوپەیمانی و ئاشتەوایی لە نێوان كورد و توركدا بەدی بێت، بۆیە كار بۆ تێكدانی پرۆسەكە دەكەن.
هاوكات سەرۆك كۆماری توركیا دەڵێت، شێوازەكانی رابردووی "رووبەڕووبوونەوەی تیرۆر" لە توركیا كێشەی قووڵیان دروست كرد، بەڵام لە 23 ساڵی رابردووی دەسەڵاتی ئاكپارتیدا ئەو هەڵانە راستكراونەتەوە.
ئەردۆغان گوتی، گوێ بەهچ دەنگێكی نەشاز نادەین و ئەو مێژووە لارە راستدەكەینەوە.