لە سایەی دووبارەبوونەوەی بۆردمانی كێڵگە نەوتی و غازییەكانی هەرێمی كوردستان، رەنگە یەكێك لە پرسیارەكان یان مەترسییەكانی باسیان دەكرێت ئەوەیە ئاخۆ ئەو كارانە تا چەند كار لە مانەوە و كاركردنی كۆمپانیا بیانییەكانی ئەو بوارە دەكەن؟، شارەزایەكی ئەمەریكی پێی وایە هێشتا دۆخەكە لە هەرێم نەگەیشتووەتە ئەو ئاستەی كاری ئەوان ئەستەم بێت.
دوای بۆردمانەكەی شەوی رابردووی كێڵگەی غازیی كۆرمۆر لە چەمچەماڵ،
پۆل سۆلیفان شارەزای ئەمەریكی لە بواری ئاسایشی وزە گوتی، تا ئێستە دۆخی هەرێمی كوردستان نەگەیشتووەتە قۆناغێك كە كاركردنی كۆمپانیا بیانییەكان ئەستەم بێت، هاوكات زۆرێك لە كۆمپانیا نێودەوڵەتییەكانی نەوت و غاز توانایەكی زۆریان بۆ بەرگەگرتنی مەترسییەكان هەیە، ئەگەرچی ئەو توانایە بەردەوام نییە.
روونی كردەوە، بەڵام ئەگەر مەترسییەكان لە بەرانبەر داهات و وەبەرهێنانەكانیان زۆر زیاتر بوو، رەنگە ئەوكات بیر لە مانەوەیان بكەن، بۆیە ئاستی بیركردنەوەیان لەو بارەتە دەوەستێتە سەر ئەو گرێبەستانەی كۆمپانیاكان واژوویان كردووە، حاڵەتی هێزی بەرگەنەگیراو، یەكێكە لە دەربازبوون لە گرێیەستەكانی واژوو كراون، واتە كاتێك رووداوەكان بەو شێوەیە پێناسە دەكرێت كە ئەستەمە بتوانن لە كاركردن بەردەوام بن.
سەبارەت بە دۆخی ئێستەی هەرێمی كوردستان گوتی، پێم وا نییە گەیشتبینە ئەو قۆناغە، سەبارەت بە هەڵوێستی ئەمەریكا بەرانبەر بەوەی روودەدات ئاماژەی كرد، رەنگە ئیدارەی ئەمەریكا گوشار بخاتە سەر بەغدا بۆ پاراستنی كێڵگەكان و ژێرخانی وزە، بەڵام هەندێك جار ناتوانرێت پێشبینیی بڕیارەكانی ئەو ئیدارەیە بكرێت.