بە ئامادەبوونی ژمارەیەكی زۆر لە توێژەران و ئەكادیمیستانی ناوخۆ و دەرەوە، لە شارۆچكەی جزیرەی بۆتانی سەر بە پارێزگای شرناخی باكوری كوردستان، كارەكانی چوارەمین سیمپۆزیۆمی نێودەوڵەتیی مەلای جزیری دەستی پێ كرد.
عەبدولڕەحیم ئالقش سەرۆكی زانكۆی شرناخ ڕای گەیاند، بەشداریكردنی سەرۆك بارزانی لەم چالاكییە زانستی و ڕۆشنبیرییەدا، جێگەی شانازی و خۆشحاڵییەكی گەورەی ئەوانە و پێشوازییەكی گەرم لە ئامادەبوونی دەكەن لە خاك و زێدی مەلای جزیریدا.
بەپێی زانیارییەكانی سەرۆكی زانكۆكە، نزیكەی 90 كەسایەتی و توێژەر لە سەرانسەری جیهانەوە بانگهێشت كراون بۆ ئەوەی بەشداری لەم ڕووداوە گرنگەدا بكەن.
سیمپۆزیۆمەكە كە ماوەی دوو ڕۆژ دەخایەنێت، جگە لە میوانانی بیانی و ناوخۆی توركیا، ژمارەیەكی بەرچاو لە مامۆستایان و ئەكادیمیستانی زانكۆكانی هەرێمی كوردستانیشی لەخۆ گرتووە.
بڕیارە لەو ماوەیەدا توێژەران لە ڕێگەی پانێڵ و سیمینار و وتاری جیاوازەوە، توێژینەوەكانی خۆیان لەسەر ژیان و بەرهەم و كاریگەریی مەلای جزیری پێشكەش بكەن.