دوای ئەوەی هاتوچۆی هەولێر لەسەرجەم شوێنەكانی پێچكردنەوە لە شاری هەولێر كامێرای دانا و ئەو كامێرایانە كاریان بریتییە لە تۆماری ئەو سەرپێچییەی كە دوو بۆ سێ ساید شوفێران دەسووڕێنەوە، دوو رۆژە ئەو سەرپێچییە كۆتای پێهاتووە و شوفێران و هاووڵاتییانی دڵخۆش كردووە.
ئەمرۆ شەموو 29ـی تشرینی دووەم، هیمداد خۆشناو چالاكوان و ئەندامی رێكخراوەكانی تایبەت بە هاتوچۆ، بە "وشە"ـی راگەیاند، دانانی كامێرای چاودێری لە شوێنەكانی پێچكردنەوە جێگای دڵخۆشی هەمووانە.
زیاتر گوتی، ئەو سەرپێچییەی پێشتر لە شوێنەكانی سوورانەوە ئەنجام دەدرا بە ناشرینترین سەرپێچی و دیاردەیەكی ناشاز و ناخۆش دەزانرا ئێستە دوو رۆژە بەهۆی ئەو كامێرایانە بەرەو كۆتایی دەچێت.
باسی لەوەش كرد، پێشتر لەگەڵ بەرپرسانی هاتوچۆ قسەیان كردووە، تا رێگاش هەر ئەوەبوو بە سزای مادی ئەو كێشەیە چارەسەر بكرێت، هەرچەندە ئامانج سزا نییە بەڵكو بۆكۆنتڕۆل كردن و ڕێكخستی هاتوچۆیە لە شەقامەكان.
هاتوچۆی هەولێر بڵاوی كردەوە، كامێراكانی تۆمار كردنی سەرپێچی تیژڕۆیی و سوڕانەوەی نایاسایی دەكەوێتە كار بەشێوەی تاقیكردنەوە (تێست) لە 27ـی تشرینی دووەم كەوتووەتە كار، سەرپێچیەكانی تیژڕۆیی و سوڕانەوەی نایاسایی لە سوڕانەوەكان تۆمار دەكرێن لە سیستمی سزادانی هاتوچۆ.
بەرێوەبەرایەتی هاتوچۆ ئاماژەی بەوە كردووە، دانانی ئەو كامێرایانە بۆ كۆنتڕۆلكردن و ڕێكخستی هاتوچۆیە لە شەقامەكان و كەمكردنەوەی ڕوودوای هاتوچۆ و پاراستنی گیانی هاووڵاتییانە.