به‌گوێره‌ی نوێترین ئاماری فه‌رمانگه‌ی ئاماری ئێران، رێژه‌ی هه‌ڵاوسان له‌و وڵاته‌دا بۆ مانگی دووه‌می پایزی ئه‌مساڵ له‌چاو هه‌مان ماوه‌ی ساڵی رابردوو، گه‌یشته 50%.
ئاماره‌كه ئه‌مڕۆ پێنجشه‌م بڵاو كراوه‌ته‌وه و جگه له هه‌ڵاوسانی خاڵ به خاڵ، هه‌ڵاوسانی ساڵانه‌شی به 40% راگه‌یاندووه.
ئه‌و ئاماره نوێیه به‌و واتایه دێت هه‌ر خێزانێكی ئێرانی له‌م مانگه‌دا، به رێژه‌ی 50% زیاتر له ساڵی رابردووی بۆ پێداویستییه سه‌ره‌كییه‌كانی ژیان خه‌رج كردووه.
هه‌ڵاوسانی مانگه‌كه به‌راورد به مانگێك پێشتر، 3.4% به‌رز بووه‌ته‌وه و زۆرترین رێژه‌ی هه‌ڵكشانی نرخیش بۆ بواره‌كانی خۆراك بووه.
ئێران له دۆخێكی ناله‌باری ئابووریدایه و ناتوانێت نرخی شتومه‌كه‌كان له بازاڕ كۆنترۆڵ بكات، رۆژ به رۆژیش له به‌های دراوه‌كه‌ی كه‌م ده‌بێته‌وه.
سزاكانی ئه‌مدواییه‌ی ئه‌مه‌ریكا و كۆمه‌ڵگه‌ی نێوده‌وڵه‌تی، خه‌ریكه كاریگه‌رییه‌كانی زیاتر له‌سه‌ر كۆمه‌ڵگه‌ی ئێران به‌دیار ده‌كه‌ون و باری بژێوی و ژیان له‌م وڵاته قورستر ده‌كات.