بازاڕی زێڕ لە ژێر کاریگەریی ئەگەری زیاتری دابەزاندنی رێژەی سوودی بانکی لە لایەن رێزێرڤ فیدراڵی ئەمەریکا گەشاوەتەوە و لە ماوەی هەفتەی رابردووی بازاڕی بۆرسە 170 دۆلار هاتووەتە سەر هەر ئۆنسێک و هێندەی نەماوە بەربەستی هەڵکشانی نرخی زیاتر بشکێنێت و ژمارەی پێوانەیی لە مێژوودا تۆمار بکات.
نرخی زێڕ له سه‌ره‌تای ئه‌مساڵه‌وه تا 20ی مانگی رابردوو، به‌رده‌وام له به‌رزبوونه‌وه‌دا بوو و چه‌ندان جار ژماره‌ی پێوانه‌یی له مێژووی ئه‌و كانزایه‌دا شكێنرا، تا 10 رۆژ لەمەوبەر رووی لە دابەزین بوو و لە ماوەی هەفتەی رابردوو بە تایبەتی دوو رۆژی کۆتایی هەفتە بەرێژەیەکی بەرچاو هەڵکشا و نرخەکەی بە چوار هەزار و 218 دۆلار بۆ هەر ئۆنسێک داخرا.
بەو پێیە هێندەی نەماوە زێڕ بەربەستی بەرزبوونەوەی نرخ بشکێنێت و ئه‌گه‌ر به‌ربه‌ستی چوار هه‌زار و 244 دۆلار ببڕێت، چاوه‌ڕوانی ئه‌وه ده‌كرێ به‌مزووانه جارێكی تر ژماره‌ی پێوانه‌یی له مێژوودا بشكێنێت. به‌رزترین نرخی زێڕ كه تا ئێسته تۆمار كرابێت، بۆ 20ی مانگی رابردوو ده‌گه‌ڕێته‌وه كه هه‌ر ئۆنسێكی گه‌یشته چوار هه‌زار و 381 دۆلار.
له رووی شیكردنه‌وه‌ی ته‌كنیكاڵییه‌وه، چوار هه‌زار و 244 دۆلار به‌ربه‌ستێكی نوێی بازاڕی زێڕ بۆ هه‌ڵكشانی نرخ هه‌ژمار ده‌كرێت، ئه‌گه‌ر نرخی ئۆنس ئه‌مجاره ئه‌و به‌ربه‌سته بشكێنێت، ئه‌وا چاوه‌ڕوانی ئه‌وه ده‌كرێ نرخی زێڕ دیسان ژماره‌ی پێوانه‌یی تۆمار بكات. پێچه‌وانه‌ی ئه‌م دۆخه بۆ دابه‌زینی نرخی زێڕ بریتییه له سێ هه‌زار و 999 دۆلار و ئه‌گه‌ر ئه‌و به‌ربه‌سته‌ش له دابه‌زین بشكێنێت، ئه‌وا چاوه‌ڕوان ده‌كرێ نرخی زێڕ پاشه‌كشه بكاته‌وه.
به‌گشتی ناوه‌نده ئابووری و داراییه‌كان ئه‌وه‌نده‌ی باس له ئه‌گه‌ری به‌رزبوونه‌وه‌ی نرخه‌كه‌ی ده‌كه‌ن، ئه‌وه‌نده باس له دابه‌زینی ناكه‌ن.
بەگوێرەی نوێترین پێشبینیی وەبەرهێنەران ئەگەری ئەوەی جارێکی تر رێزێرڤ بانکی ئەمەریکا بڕیاری دابەزاندنی رێژەی سوودی بانکی بدات زۆر زیادی کردووە و ئەوەش ئەوانی هان داوە روو لە کڕینی بڕێکی زیاتری زێڕ بکەن.
بارت میلک بەڕێوەبەری ستراتیجیی کڵا لە کۆمپانیای تی دی سکیوریتیز پێشبینی کردووە تا ساڵی 2026 جیهان هەر بەم شێوەیە ئابوورییەکی لاوازی هەبێت و هەر بەو هۆیەوە فیدراڵ رێزێرڤ جارێکی تر نرخی سوود لەم بکاتەوە. لێكۆڵه‌رانی بازاڕی زێڕ ده‌ڵێن، ئه‌گه‌ر جارێكی تر رێژه‌ی سوودی بانكی دابه‌زێنرێت، ئه‌وا له‌وانه‌یه دیسان زێڕ له نرخدا ژماره‌ی پێوانه‌یی بشكێنێت.
لێكۆڵه‌ڕه‌وانی گۆڵدمه‌ن ساكسیش رایان گەیاندووە نرخی زێڕ روو له هه‌ڵكشان ده‌كاته‌وه، نرخی زێڕ تا كۆتایی 2026 ده‌گاته چوار هه‌زار و 900 دۆلار و له‌چاو نرخی ئێسته‌ی 21% به‌رز ده‌بێته‌وه. پاساوی سه‌ره‌كیی گۆڵدمه‌ن ساكس و زۆرینه‌ی وه‌به‌رهێنه‌ران و چاودێرانی بازاڕی زێڕ ئه‌وه‌یه، داخوازی بۆ كڕینی زێڕ به‌تایبه‌تی له‌لایه‌ن بانكه ناوه‌ندییه‌كان و وه‌به‌رهێنه‌ره تایبه‌تییه‌كان، به‌رده‌وام له به‌رزبوونه‌وه‌دایه، هه‌ر ئه‌وه‌ش به هۆكاری سه‌ره‌كیی به‌رزبوونه‌وه‌ی به‌های زێڕ داده‌نرێت.
له‌لایه‌كی تره‌وه بانكی وه‌به‌رهێنانی سویسرایی، دواین پێشبینی خۆی له‌باره‌ی ئاسۆی بازاڕی زێڕ راگه‌یاندووه و گوتوویه‌تی، نرخی هه‌ر ئۆنسێكی ده‌گاته چوار هه‌زار و 900 دۆلار.
دامه‌زراوه‌ی ''یوو بی ئێس''یش، پێشبینییه‌كه‌ی پێشتری له به‌رزكردنه‌وه‌ی به‌های زێڕ بۆ ساڵی 2026 له چوار هه‌زار 200 دۆلاره‌وه بۆ چوار هه‌زار و 500 دۆلار به‌رز كردووه‌ته‌وه.
زێڕ كاڵایه‌كی زۆر متمانه‌پێكراوه، بۆیه‌ش رووداوه سیاسی و بازرگانییه‌كان و پرسه‌كانی جه‌نگ و ئاشتی له دنیادا كاریگه‌ریی ده‌خه‌نه سه‌ر بازاڕه‌كه‌ی. له دۆخی پاشه‌كشه‌ی ئابووری و جه‌نگ و بێ متمانه‌یی بازاڕه‌كان وه‌به‌رهێنه‌ران زیاتر روو له كڕینی زێڕ ده‌كه‌ن، چونكه ترسی ئه‌وه‌یان هه‌یه له‌پڕ سه‌رمایه‌كه‌یان له‌ناو بچێت.
به‌گوێره‌ی نوێترین نرخی زێڕ له بازاڕه‌كانی هه‌ولێر، هه‌ر مسقاڵێك زێڕی عه‌یار 21 به 845 هه‌زار دینار، عه‌یار 18 به 725 هه‌زار دینار و عه‌یار 24 به 965 هه‌زار دینار ده‌فرۆشرێت، هه‌ر 100 دۆلاریش به 141 هه‌زار و 850 دینار ده‌ستنیشان كراوه. زێڕنگری ئازورا له هه‌ولێر بۆ ئه‌م نرخانه‌ی ئۆنسێك زێڕی به چوار هه‌زار و215 دۆلار كردووه‌ته بنه‌ما.