هەڵبژاردنی پەرلەمانی عێراق ساز كرا و بڕیارە هەفتەی داهاتوو دوای یەكلاكردنەوەی سكاڵاكان، ئەنجامەكان بەفەرمی بێنە راگەیاندن، دواتر لەسەر بنەمای دەنگی هەموو لایەنەكان ژمارەی كورسییەكانی دیاری دەكرێن و پەرلەمان یەكەم دانیشتن ساز دەكات و سەرۆكی پەرلەمان و سەرۆك كۆمار دێنە هەڵبژاردن.
بەپێی ئەو نەریتەی پرۆسەی سیاسیی عێراقی لەسەر بنیات نراوە، سەرۆكی پەرلەمان بۆ پێكهاتەی سوونە و سەرۆك كۆماریش بۆ كوردە، بۆیە یەكلاكردنەوەی ئەو دوو پۆستە سەرەتا لە لایەن دوو پێكهاتەكەیە و دوایی لە پەرلەمان یەكلا دەكرێنەوە و دەنگی پەرلەمانتاران یەكلایان دەكەنەوە.
كێشەی گەورە لە ناو ماڵی شیعەیە و لە دوایین هەڵبژاردن كێشە لەسەر گەورترین بارستەی پەرلەمانی و راسپاردنی بۆ پێكهێنانی حكوومەت دروست بوو، هەر شیعە خۆیان چواریەكی پەكخەریان لە ناو پەرلەمان دروست كرد و پێكهێنانی حكوومەتیان لە لایەن رەوتی سەدر پەك خست،
غالب دەعمی مامۆستای راگەیاندن لە زانكۆی كووفە دەڵێت، تا ئێستە پێشبینیكردنی سیناریۆكانی پێكهێنانی حكوومەتی نوێ زەحمەتە.
روونی كردەوە، دەكرێ بگوترێت سوودانی نزیكترینە لە سەرۆكایەتیی حكوومەت، ئەوە ئەگەر توانی لایەنەكانی چوارچێوەی هاوئاهەنگی رازی بكات، چونكە ئەو ڤیتۆی لە دەرەوە لەسەر نییە، پێچەوانەی هەندێك لە نەیارەكانی كە ڤیتۆی دەرەكییان لەسەرە، ئەو چەند ركابەرێكی تری هەیە لەوانە حەیدەر عەبادی و مستەفا كازمی و رەنگە كەسایەتییەكی تەناهیش، بەتایبەتی لە سایەی گۆڕانكارییەكانی ناوچەكە و دنیا.
سەرەڕای ئەوەی دیاریكردنی كاندیدی سەرۆك وەزیران پێوەندیی بە سازانی ناوخۆییەوە هەیە، بەڵام یاریكەرە سەرەكییەكانی ناوخۆیی رەچاوی بۆچوونی مەرجەعیەتی نەجەف دەكەن، جیا لە واشنتن و تاران، بۆیە شارەزایان پێیان وایە پێكهێنانی حكوومەتی نوێ لەوانەی پێشتر ئاڵۆزتر دەبێت و پێویستی بە سازانی شیعە هەیە، جیا لەوەش سازان لەگەڵ سوننە و كوردیش، كە رەنگە ئەوەش وا بكات هێزە براوەكان بۆ خۆلادان لە دروستكردنی ئاڵۆزی و گەیشتن بە داخرانی سیاسی، پەنا بۆ پێكهێنانی حكوومەتێكی سازانی نیشتمانی ببەن، كە هەموو پێكهاتەكان لەخۆ بگرێت.
سەرچاوەیەكی نزیك لە چوارچێوەی هاوئاهەنگی باسی كۆبوونەوەیەكی ئێوارەی دوێنێی هێزەكانی چوارچێوە لە دوای راگەیاندنی ئەنجامەكانی هەڵبژاردن دەكات، ئەوان گفتوگۆیان لەسەر چەند بابەتێك كردووە پێوەست بە هەڵبژاردنەكان و دابەشكردنی ئەرك و پۆستەكان بەپێی سەنگ و پێگەی هەڵبژاردن و سیاسی، ئەوان تاوتوێی پێكهێنانی حكوومەت و دیاریكردنی پێوەر و ناسنامەی سەرۆك وەزیرانی داهاتووی عێراقیان كردووە، جیا لە پێكهێنانی هاپەیمانیەتی بۆ ئەو مەبەستە.
روونی كردەوە، چوارچێوەی هاوئاهەنگی هێڵە گشتی و تایبەتەكانی پرۆسەی سیاسیان لە وڵات دیاری كرد، بەوەی نابێت لە وادە دەستوورییەكان تێپەڕ بكات و ئەوان سوورن لەسەر پێكهێنانی حكوومەت بەر لە وادەی دیاریكراوی خۆی، بۆیە بابەتی سەرۆكایەتیی حكوومەت بە زوویی یەكلا دەبێتەوە، بەتایبەتی ئەنجامە سەرەتاییەكان سەنگ و قورسایی هێزە سیاسییەكانی ناو چوارچێوەی هاوئاهەنگی و هێزەكانی تریشی بەگشتی دەرخست.
سەرچاوەكە بەدووری نەزانی جارێكی تر سوودانی پۆستی سەرۆك وەزیرانی پێ بدرێت، ئەگەر هێزەكانی تر لە دژی نەوەستنەوە وەك نووری مالیكی، زۆرینەی پێكهاتەكانی چوارچێوە ئامادەی كۆبوونەوەكە بوون جگە لە سوودانی، دووپاتی كردەوە كە ناسنامەی سەرۆك وەزیرانی داهاتوو لە دوای پەسندكردنی ئەنجامی كۆتایی هەڵبژاردن دیاری دەكرێت.
دوای ئەوەی لە 11ی ئەم مانگە هەڵبژاردنی شەشەم خولی پەرلەمانی عێراق بەڕبَوە چوو، دوێنێ پێنجشەم كۆمسیۆنی باڵای سەربەخۆی هەڵبژاردنەكان رای گەیاند كە لە دوای جیاكردنەوەی 99.9% دەنگەكان، دەركەوت رێژەی بەشداریكردن لە دەنگدانی گشتی 54.35% بووە و 10.904.637 ملیۆن دەنگدەر دەنگیان داوە لە كۆی 20.063.773 ملیۆن دەنگدەر كە مافی دەنگدانیان لە دەنگدانی گشتی هەبوو.
روونی كردەوە، پارێزگاكانی هەرێمی كوردستان و نەینەوا زیاترین رێژەی بەشداریكردنیان هەبوو، لە دهۆك گەیشتە 76.07% و لە هەولێر گەیشتە 69.02% و لە نەینەواش 64.07%، لە سلێمانیش 64.12% و لە هەڵەبجەش 56.87%، لەوكاتەی رێژەی بەشداریكردن لە دەنگدانی تایبەت 82.52% بوو و 1.084.289 ملیۆن كەس دەنگیان دا لە كۆی 1.313.980 ملیۆن كەس كە مافی دەنگدانیان هەبوو.