كچە گۆرانیبێژێكی ئەمەریكای لاتین كە لە بوارەكەی خۆیدا بە "دی لاروسا" دەناسرێتەوە، وەك پۆلیس دەڵێت لە بۆسەیەكدا لە لۆس ئەنجیلۆس كوژراوە. تا ئێستە بكوژەكەی ئاشكرا نەكراوە و نەگیراوە.
پێگەی "شەفەق نیوز" ئەمڕۆ پێنجشەم 27ی تشرینی دووەم بڵاوی كردووەتەوە، ماریا دی لاروسا كە كچە گۆرانیبێژێكی ئەمەریكای لاتینە، لە ناو ئۆتۆمبێلەكەی لە لۆس ئەنجیلۆس تەقەی لێ كراوە و وەك پۆلیس دەڵێت، كوشتنەكەی لە رێگەی بۆسەیەك بووە.
وەك میدیاكانی ئەمەریكا بڵاویان كردووەتەوە، لاروسا /22 ساڵ/ كاتێك تووشی رووداوەكە بووە، دوو كەسی تریشی لەگەڵدا بووە، بكوژەكانیش لێی نزیك بوونەتەوە ئەوجا تەقەیان لێ كردووە. كاتێك گوازراوەتەوە بۆ نەخۆشخانە، لە رێگەدا گیانی لە دەست داوە. بەڵام ئەو دوو كەسەی لەگەڵیدا بوون، بە سووكی بریندار بوون.
پۆلیس دەڵێت، تا ئێستەیش لیكۆڵینەوە لە رووداوەكە بەردەوامە و پەنجەی تۆمەت بۆ سێ كەس درێژ كراوە، پێیان وایە دەستی ئەوانی لە پشت بووە. بەڵام بكوژی سەرەكیی رووداوەكە تا ئێستە ئاشكرا نەكراوە و كەسیش بەهۆیەوە نەگیراوە.
دی لاروسا یەك لە گۆرانیبێژە گەنجە دیارەكانی ئەمەریكایە و لە بواری موزیكی پۆپدا كاری هونەریی دەكرد، بەتایبەتی لە رێگەی تۆڕە كۆمەڵایەتییەكان زۆرترین هەواداری هەبووە. بەمدواییە خەریكی ژمارەیەك كاری هونەریی بووە و نیازی هەبووە هەر ئەمساڵ 2025 بڵاویان بكاتەوە.