هه‌ڤژینی پرۆسه‌ییه‌كا ئالووزه و چوو پیڤه‌رێن ئێكلاكه‌ر نینن كو جوداهیێ دناڤبه‌را هه‌ڤژینیا سه‌ركه‌فتی و سه‌رنه‌كه‌فتی بكه‌ت، به‌لێ پشكه‌ك ژ تاكێن جڤاكی ل وێ باوه‌ریێ نه كو ئه‌ڤینی خاله‌كا گرنگه بۆ نیاسینا هه‌ڤژینیێ به‌ری پێكئینانێ و پرانی ژی خوه ب هه‌ڤژنیا سوتڤه گرێ دده‌ن.
پرژین حه‌سه‌ن، چالاكڤانا ئافره‌ت ل دهۆکێ دیاركر كو هه‌ڤژینیی مه‌زنترین پرۆسه‌یه د ژیانا هه‌ر تاكه‌كێ جڤاكی و دڤێت ل سه‌ر بنه‌مایه‌كێ هه‌ری گرنگ و بهێز بهێته ئاڤاكرن و بۆ "وشە" گۆت، دوو بنه‌مایێن سه‌ره‌كی دناڤ جڤاكی دا هه‌نه و پرانیا هه‌مووان به‌ربه‌لاڤه و ل سه‌ر وان هه‌ردوو بنه‌مایان هه‌ڤژینیی دهێته پێكئینان، هه‌ر چه‌نده هه‌ردوو بنه‌ما ژی ئێكلاكه‌ر نینن كو جوداهیێ بێخیته دناڤبه‌را هه‌ڤژینیا سه‌ركه‌فتی و هه‌ڤژینیا سه‌رنه‌كه‌فتی به‌ری كو بهێته پێكئینان ئه‌و ژی پێكئینانا هه‌ڤژینیێ ل سه‌ر بنه‌مایێ ئه‌ڤینیێ و پێكئینانا هه‌ڤژینیێ ل سه‌ر بنه‌مایێ سوتڤه و ژ نیشكه‌كێڤه.
زێده‌تر گۆت، هندی پێكئینانا هه‌ڤژینیێ یه ل سه‌ر بنه‌مایێ ئه‌ڤینیێ دزڤریت بۆ وێ یه‌كێ كو نیاسینه‌كا تمام دناڤبه‌را كچ و كورا دروست بیت و هه‌ردوو هه‌ڤدو باش بناسن و خالێن بهێز و لاواز یێن هه‌ڤدو و ئاستێ هه‌ڤدو بزانن ئه‌و ژی ئه‌گه‌ر ل سه‌ر بنه‌مایێ حه‌ز و ئاره‌زویێن سێكسی نه‌هێته دروستكرن و ئه‌ڤینه‌كا راسته‌قینه و ل سه‌ر بنه‌مایێ پێكڤه ژیانێ بیت د خوشی و نه‌خۆشیان دا، دیسان هندی پێكئینانا هه‌ڤژینیێ ل سه‌ر بنه‌مایێ سوتڤه ژی دزڤریت بۆ وێ یه‌كێ كو كه‌سێ سێ وه‌كو واسته دناڤبه‌را وان دا هه‌یه و پرانیا جاران ژی دایباب یان حزم و كه‌سوكار یان هه‌ڤال ب ئه‌ركێ دانه نیاسینا كچی یان كوری بو هه‌ڤدوو دروست بیت، بێگومان ئه‌ڤێ یه‌كێ ژی ئه‌رێنی و نه‌رێنیێن خوه هه‌نه، نه‌رێنی ئه‌وه كود بیت هه‌ڤدو باش نه نیاسی بیت و جوداهیێن زور ل ئاستێ ره‌وشه‌نبیری و دارایی و جڤاكی و هه‌تا دوماهیێ هه‌بن و ب هه‌ڤدوو نه‌زانن، لایه‌نێ نه‌رێنی ئه‌وه كو خه‌لكه‌ك هایدارێ ره‌وشتێ هه‌ردوایه و دویرن ژ ئه‌ڤینه‌كا خراپ و دێ ل سه‌ر بنه‌مایه‌كێ نوێ و بهێز ژیانێ ده‌ست پێ كه‌ن، بێگومان مرۆڤ نه‌شێت بریارێ ل سه‌ر هه‌ردوو بنه‌مایێن ل سه‌ری بده‌ت كا كیش باشتره، تنێ ئه‌م دشێن بێژین كو ده‌م هات كچ و كور هه‌ڤدوو بناسن ب تمامی به‌ری كو هه‌ڤژینیی پێكبینن ژبه‌ركو هه‌ڤژینی ته‌مه‌نه و هه‌تا مرنێ ب خوشی و نه‌خوشی دڤێت ل گه‌ل هه‌ڤدو بژین.
ب گوره‌ی راپرسیه‌كێ كو ل سه‌ر تورا جڤاكی یا فه‌یسبوكێ هاتیه ئه‌نجامدان و 339 كه‌سان پشكداری تێدا كریه،53.1% کو دبنە 180 کەس وه‌سا هزر دكه‌ن و ل وێ باوه‌ریێ نه، پێكئینانا هه‌ڤژینیێ ل سه‌ر بنه‌مایێ سوتڤه باشتره ژ پێكئینانا هه‌ڤژینیێ ل سه‌ر بنه‌مایێ ئه‌ڤینیێ ب رێژا 46.9%.